Air India barlyq ushqyshtaryn esirtki testinen ótýge mindettedi
ASTANA. KAZINFORM — Air India áýe kompanııasy kapıtanynan marıhýana anyqtalǵannan keıin barlyq ushqyshyn esirtki testinen ótkizbek, dep habarlaıdy NDTV.
Qoldanystaǵy erejege sáıkes, áýe kompanııalary jyl saıyn ushý ekıpajynyń keminde 10%-yn esirtki testinen ótkizýge mindetti.
Alaıda endi testileý Gýrýgramdaǵy áýe kompanııasynyń akademııasynda oqý sabaqtary kezinde, reısterden keıin, sondaı-aq ushý aldyndaǵy brıfıng ortalyqtary men brıfıng ótkiziletin keńselerde jáne ushqyshtardyń ornalasqan jerinde júrgiziledi.
Testileý sonymen qatar kompanııanyń bıýdjettik bólimshesi Air India Express ushqyshtaryna da qoldanylady.
— Ózderińizge belgili, Air India qazirdiń ózinde Azamattyq avıatsııanyń Bas dırektsııasy (DGCA) belgilegen barlyq normatıvtik talaptardy tolyq oryndaıdy. Bul talaptar Eýropa men AQSh-ty qosa alǵanda, basqa da iri avıatsııalyq ıýrısdıktsııalarda qoldanylatyn normalarǵa sáıkes keledi. Alaıda biz qaýipsizdik sharalaryn odan ári kúsheıtý qajet dep sanaımyz. Osyǵan baılanysty kompanııanyń barlyq ushqyshyn qoldanystaǵy erejelerde tyıym salynǵan zattar men dári-dármekterdi qoldanýyna qatysty tolyq tekserýden ótkizý týraly sheshim qabyldadyq, — delingen Air India málimdemesinde.
Bul sheshim 4 tamyzdaǵy Phýketten Delıge bet alǵan Air India ushaǵynyń kenetten bıiktigin joǵaltýyna baılanysty bastalǵan tergeý boıynsha qabyldandy.
Keıin kapıtannyń esirtki zatyn tutynǵany anyqtaldy.
Bortta 137 jolaýshy jáne segiz ekıpaj múshesi bolǵan. Oqıǵa saldarynan keminde 20 jolaýshy jáne tórt ekıpaj múshesi jaraqat aldy.
Buǵan deıin AQSh-ta 2 myńnan astam geımer áýe dıspetcheri qyzmetine qabyldanatynyn habarlaǵan edik.
