«Air China» Qazaqstanǵa qaıta ushaq ushyra bastaıdy

ASTANA. QazAqparat - QR IIDM Azamattyq avıatsııa komıteti QHR avıatsııalyq bılik oryndarymen birlesip «Air China» áýe kompanııasynyń Qazaqstan men Qytaı arasyndaǵy turaqty jolaýshylar reısterin qalpyna keltirý máselesin pysyqtady, dep habarlaıdy QazAqparat atalǵan vedomstvonyń baspasóz qyzmetine silteme jasap.

2023 jyldyń 21 sáýirinen bastap Air China áýe kompanııasy Beıjiń – Sıan – Astana baǵyty boıynsha aptasyna 3 ret jıilikpen (dúısenbi, sársenbi, juma) tikeleı jolaýshylar reısin oryndaýdy josparlap otyr.

Reıster Airbus-A320 tıpti áýe kemelerimen jasalady.

Óz kezeginde, Qazaqstan tarapynan «Air Astana» áýekompanııasy aǵymdaǵy jyldyń maýsym aıynan bastap Astana – Beıjiń baǵyttary boıynsha oryndalatyn reıster sanyn 1 – den 2 reıske deıin, Almaty – Beıjiń baǵyttary boıynsha 6-dan 7 reıske deıin jáne Almaty-Chendý baǵyttary boıynsha aptasyna 1-den 2 reıske deıin ulǵaıtýdy josparlap otyr.

Osylaısha, elder arasyndaǵy reıster sany aptasyna 13-ten 19 reıske deıin ulǵaıtylady, onyń ishinde qytaılyq «China Southern Airlines» áýe kompanııasy Astana – Úrimshi baǵyty boıynsha aptasyna 2 reıs jáne Almaty – Úrimshi baǵyty boıynsha 3 reıs.

Qazaqstan men Qytaı arasyndaǵy jańa baǵyttardyń ashylýy jáne áýe reıster sanynyń artýy elder arasyndaǵy týrıstik, mádenı, ınvestıtsııalyq jáne iskerlik yntymaqtastyqty odan ári damytýǵa yqpal etetin bolady.