Air Astana jolaýshylary Shymkentke jete almaı, qaıta oraldy
ALMATY. QazAqparat – Almatydan Shymkentke baǵyt alǵan Air Astana reısi ushpaı qaldy, dep habarlaıdy QazAqparat tilshisi.
Atalǵan reıs jolaýshylary áleýmettik jelide narazylyq bildirýde.
«Áýejaıda 50 den asa jolaýshy Air Astana (KS 971, ushý ýaqyty 7.35, baǵyt Shymkent) servısine narazy. Biz aspanǵa kóterilip, Qapshaǵaıǵa jettik te, aınalyp aınalyp, qaıtyp keldik. Bir saǵattaı ushaqta otyrdyq. Keıin ekıpaj jeldetý júıesinde aqaý paıda bolǵanyn túsindirip jatty. Áýejaıda menedjerdi ózimiz taýyp aldyq. Menedjer bolsa Astanadan Shymkentke táýlik boıy jete almaı kele jatqan úlken kisilerge dórekilik kórsetti. Meniń kezdesýlerim men dárisim bolmaıtyn boldy. Amalym quryp, úıime qaıtyp keldim», - dep jazdy «Qant dıabetin zertteý boıynsha Qazaqstan qoǵamy» AQ prezıdenti Janaı Aqanov.
Bul oqıǵaǵa baılanysty Air Astana ókilderi túsinik berdi.
«Ýaqytsha qolaısyzdyqtar úshin keshirim suraımyz. «Eır Astana» áýe kompanııasy reıster bógelgen, ushpaı qalǵan, aýysqan jaǵdaıda Halyqaralyq áýe kóligi qaýymdastyǵynyń erejesi boıynsha áreket jasaıdy. Eń aldymen birinshi kezekte jolaýshylardyń qaýipsizdigi birinshi orynda turady. Eger basqa da suraqtaryńyz bolsa ce@airastana.com elektrondy poshtasyna jazýyńyzdy suraımyz», - dedi Air Astana áýe kompanııasynan.
