Air Astana jolaýshylary Frankfýrtta bógelip qaldy
ALMATY. QazAqparat - Air Astana áýe kompanııasynyń ushaǵy tehnıkalyq sebepterge baılanysty Frankfýrttan ekinshi táýlik usha almaı otyr, dep habarlaıdy QazAqparat tilshisi.
Áýe kompanııasynyń habarlaýynsha, qazir áýe bortyndaǵy aqaý jóndelip, reıs ushýǵa daıyn.
«Frankfýrt-Astana baǵytyndaǵy KS 922 reısi 26 naýryzda saǵat 16:00-de ushýy tıis bolǵan. Alaıda ushaq dóńgelegindegi aqaýǵa baılanysty áýe keme jolǵa shyǵa almady. Jolaýshylarǵa ystyq tamaq pen jatyn oryn qamtamasyz etildi. Reıs búgin 16:00-de ushyp shyǵýy tıis», - dedi Air Astana baspasóz hatshysy Tilek Abdrahmanov.
Reıstiń bógelgeni týraly Májilis depýtaty Irına Smırnova habarlaǵan bolatyn.
«Ekinshi táýlik Astanaǵa jete almaı jatyrmyz. Bizdiń ushaq ushýǵa jaramsyz dedi. Nemis mamandary aqaý bar dep tur. Olardyń aıtýynsha, bizdiń áýe kompanııasy aqaýly ushaqtarmen jıi keledi eken. Air Astana, biz qashan Astanaǵa jetemiz? Kúndelikti áýe bıletiniń baǵasy sharyqtap bara jatqanyna qaramastan, naryqtaǵy basqa kompanııalardy yǵystyryp bara jatqanyna qaramastan osyndaı aqaý bolatyny túsiniksiz» - dedi depýtat áleýmetik jelide.
«Eır Astana» AQ qoǵammen baılanys departamenti bógelgen reıs jolaýshylary ótemaqy alý úshin kompanııaǵa júgine alatyndaryn habarlady.
Foto: facebook.com/pg/airastana
