Air Astana jolaýshylardyń jeke derekteriniń qaýipsizdigin rastady
ASTANA. KAZINFORM – Air Astana áýe kompanııasy 2024 jyldyń aqpanynda GitHub saıtynda jarııalanǵan qazaqstandyqtardyń jeke derekteriniń shyǵý yqtımaldylyǵy týraly habarlaryna jaýap retinde tekserý qorytyndysy boıynsha jolaýshylar týraly derekterdiń buzylmaǵanyn rastady, dep habarlaıdy áýe kompanııanyń baspasóz qyzmetinen.
QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń buzýshylyqtardy joıý týraly bir jylǵa shyǵarylǵan uıǵarymynyń derbes derekter máselelerine qatysy joq.
«Air Astana aqparattyq qaýipsizdik salasyndaǵy joǵary halyqaralyq standarttardy jáne, ozyq tehnologııalyq sheshimderdi paıdalana otyryp, óz klıentteri týraly aqparattyń qupııalylyǵy men qorǵalýyn qamtamasyz etý úshin únemi jumys isteıdi. Kompanııa retteýshi talaptardyń saqtalýyna erekshe kóńil bóledi jáne bolashaqta yqtımal táýekelderdiń aldyn alý úshin baqylaýshy organdarmen dıalog pen yntymaqtastyqqa ashyqtyǵyn atap ótedi», - delingen baspasóz qyzmetiniń habarlamasynda.
Buǵan deıin Kıbershabýyldardy taldaý jáne tergeý ortalyǵy (TsARKA) qytaılyq hakerler toby Qazaqstannyń IT-ınfraqurylymynyń mańyzdy nysandaryn basqarǵany týraly maqala jarııalaǵan bolatyn, olardyń arasynda áýe kompanııasynyń aty da bar.
Kazinform agenttiginiń redaktsııasy qytaılyq hakerler tobynyń Qazaqstandaǵy mańyzdy nysandardy baqylaýyna qatysty túsinikteme alý úshin Air Astana áýe kompanııasyna habarlasty.
