Air Astana jazǵy navıgatsııaǵa kóshti: jańa baǵyttar men qosymsha reıster
ASTANA. KAZINFORM — Air Astana áýekompanııasy 29 naýryz ben 24 qazan aralyǵynda jalǵasatyn jazǵy navıgatsııaǵa kóshti. Bul ýaqytta reıster jıiligi artyp, jańa baǵyttar ashylyp, maýsymdyq reıster qaıta jandanady. Bul týraly áýe kompanııasynyń baspasóz qyzmeti málim etti.
Ushý baǵdarlamasy keńeıedi
- Astana men Almatydan Beıjiń, Ystanbul jáne Antalıa baǵyttaryna ushatyn reıster jıiligi birtindep artady.
- Mamyr aıynan bastap Astanadan Frankfýrtqa kúnde ushady.
- Almatydan Úrimshi, Tbılısı jáne Tashkentke ushatyn reıs kóbeıedi.
Jańa halyqaralyq baǵyttar ashylady
- Shanhaı – 29 naýryzdan bastap Almatydan aptasyna úsh ret (seısenbi, beısenbi jáne jeksenbi kúnderi) Airbus A321LR ushaǵy ushady.
- Gýanchjoý – 2 maýsymnan bastap Astanadan aptasyna eki reıs (seısenbi jáne beısenbi) bolady.
- Larnaka (Kıpr) – 2 maýsymnan bastap Astanadan, al 4 maýsymnan bastap Almatydan Airbus A321LR ushaǵymen oryndalatyn reıster ashylady.
Maýsymdyq baǵyttar
- Almaty men Astanadan Nıachang jáne Danangqa (Vetnam) ushatyn reıster qaıta jandanady.
- Tbılısı men Batýmı (Grýzııa) – Almaty men Astanadan ushatyn, sondaı-aq Atyraýdan Tbılısıge ushatyn reıster qaıta ashylady.
- Podgorıtsa (Chernogorııa) – Almaty men Astanadan ushatyn reıster.
- Bodrým (Túrkııa) – Almaty men Astanadan ushatyn reıster.
- Male (Maldıv araldary) – Almatydan maýsymdyq baǵyt mamyr aıynyń sońyna deıin uzartyldy.
Bıletterdi áýekompanııanyń resmı saıtynan nemese Air Astana qoldanbasynan alýǵa bolady.
Qazaqstan azamattary Qytaı, Vetnam, Túrkııa, Grýzııa, Ózbekstan jáne Maldıv araldaryna vızasyz kire alady.
Aıta keteıik, «Uzbekistan Airways» áýe kompanııasy bıylǵy jyldyń 29 naýryzynan bastap Tashkent — Atyraý baǵyty boıynsha jańa áýe qatynasyn ashady.
