Air Astana ushaǵy Shymkentke qona almady

ASTANA. KAZINFORM — Air Astana áýe kompanııasynyń Astanadan Shymkentke baǵyt alǵan reısiniń jolaýshylary kútpegen jaǵdaıǵa tap boldy. Ushaq jospar boıynsha qalaǵa túngi saǵat 23:50-de jetýge tıis edi. 

Air Astana ushaǵy Shymkentke qona almady
Foto: Air Astana

Air Astana áýe kompanııasynyń KC341 reısimen ushqan jolaýshylar Kazinform tilshisine ushaqtyń Shymkentke 23:50–de jetýi kerek bolǵanyn, biraq baǵyttyń ózgerýine baılanysty qalaǵa tek tańǵy beste kelgenin aıtty.

— Keshe Shymkenttiń ornyna Túrkistanǵa qondyq. Sodan keıin bizdi Shymkentke avtobýspen jetkizdi. Aıtpaqshy, avtobýstyń ishi sýyq boldy, al aramyzda balalar da bar edi. Shymkentte 23:50-de bolýymyz kerek edi, biraq qalaǵa tańǵy beste jettik. Taksı júrgizýshisinen estigenim, taǵy bir ushaq ta Shymkenttiń ornyna Túrkistanǵa ushyp ketken eken, — dedi jolaýshylardyń biri.

Áýe kompanııasy jolaýshylardyń shaǵymyna qatysty túsinik berdi. Kompanııa ókilderiniń aıtýynsha, baǵyttyń ózgerýine Shymkent áýejaıyndaǵy úsik tuman sebep bolǵan. 

Aýa raıynyń qolaısyzdyǵynan áýejaıda kóriný qashyqtyǵy ushaqty qondyrýǵa qajetti deńgeıden tómendegen. Sondyqtan ushaqty qondyrý jolaýshylar men ekıpajdyń qaýipsizdigine qater tóndirýi múmkin edi.

— Astana — Shymkent baǵyty boıynsha KC341 reısin oryndaǵan ushaq Shymkent áýejaıyndaǵy úsik tuman men kóriný qashyqtyǵynyń belgilengen eń tómengi mejeden tómen bolýyna baılanysty Túrkistanǵa baǵyttaldy. Shymkent — Astana baǵyty boıynsha KC342 keri reısi de Túrkistannan oryndaldy. Atalǵan reıstiń jolaýshylary avtobýspen Túrkistanǵa jetkizildi, — dep habarlady Air Astana baspasóz qyzmeti.

Eske salaıyq, buǵan deıin Almatydan Pavlodarǵa bet alǵan ushaq keri oralǵanyn habarlaǵanbyz.