Air Astana ushaǵy Almatydan Aqtóbege ushpaı qaldy

ALMATY. KAZINFORM – Búgin Air Astana ushaǵy Almatydan Aqtóbege ushpaı qaldy.

Almatylyq aqyn Asylan Tilegenniń Facebook áleýmettik jelisindegi paraqshasynda málim etkenindeı, ala tańnan áýejaıǵa barǵanymen, ushaq ushpaı qalǵan.

«Aqtóbege, jazýshy Tobyq Jarmaǵambetovtyń 90 jyldyq toıyna jetýim kerek edi. Air Astana áýeli 1 saǵat, odan keıin 4 saǵatqa keshigedi dep habarlady. Aqyry sońynda 25 saǵattan keıin, ıaǵnı erteń ushamyz dep, tóbeden tońq etkizdi. Negizi, KS-863 reısi boıynsha ushaq Almatydan saǵat 09.20-da attanyp, Aqtóbege 13.10-da qonýy kerek edi. Bizge aýa raıyna, Aqtóbedegi tumanǵa baılanysty dedi. Qanshama adam jolynan qaldy», - dedi Asylan Tilegen.

Osyǵan baılanysty atalmysh áýe kompanııasy resmı jaýap berdi.

«Áýe kompanııasy reısterdiń ýaqytyly ushýy úshin bar kúsh-jigerin salady, degenmen kestege saı júrý árdaıym qoldan kele bermeıdi. Keı kezde reıs áýe kompanııasyndaǵy jaǵdaılarǵa baılanysty (mysaly, tehnıkalyq qyzmet kórsetý, ekıpajdyń jumys ýaqyty), al keıde aýa raıy, áýejaı jumysy, qaýipsizdik, aldyńǵy reıstiń keshigýi sııaqty áýe kompanııasyna táýeldi emes sebeptermen keshigedi. Jolaýshylar men ekıpajdyń ómirine qaýip tónse, biz eshqashan táýekelge barmaımyz. Ondaı jaǵdaıda reısti keshiktirip, ushaq tolyq jumys isteıtine kóz jetkizbeı ushyrmaımyz. Jolaýshylar qaýipsizdigi - bizdiń basty basymdyǵymyz», - delingen onda.

Eske sala keteıik, budan buryn Oral qalasynan Mysyrǵa qatynaıtyn reıster sany artatynyn jazǵan bolatynbyz.