«Air Astana» Portýgalııada apatty jaǵdaıda qonǵan ushaqqa qatysty túsinik berdi
ALMATY. QazAqparat - «Air Astana» áýe kompanııasynyń basshylyǵy Portýgalııadaǵy áskerı aerodromǵa apatty jaǵdaıda qonýǵa májbúr bolǵan ushaqqa qatysty túsinik berdi, dep habarlaıdy «QazAqparat» HAA tilshisi.
Kompanııa basshylyǵy 11 qarasha kúni Portýgalııa aspanynda bolǵan oqıǵaǵa qatysty túsinik berý úshin arnaıy baspasóz máslıhatyn ótkizdi.
«Oqys oqıǵaǵa tap bolǵan Embraer 190 ushaǵy 2013 jyldyń jeltoqsanynda shyǵarylǵan. Biz ony óndirýshiniń zaýytynan alǵanbyz. Oqys oqıǵa bolǵan kezde ushaq josparly tehnıkalyq qyzmet kórsetýden qaıtyp kele jatqan edi. Áýege kóterilgennen soń kóp keshikpeı ushaqtan aqaý anyqtaldy. Ol júrgizilgen jóndeý jumystarynyń saldary ekeni belgili», - deıdi kompanııa prezıdenti Pıter Foster.
Onyń aıtýynsha, ushaq bortynda 3 pılot - 1 kapıtan jáne 2 ekinshi pılot bolǵan. Onyń úsheýi de Qazaqstan azamaty. Sondaı-aq, ekeýi qazaqstandyq, biri brıtanııalyq - 3 ınjener olarmen birge bolǵan.
«Kapıtan Vıacheslav Aýshev bulttardyń arasyna kirip ketpeý úshin ushý bıiktigin arttyrý boıynsha barlyq sharalardy qoldanǵan. Birneshe mınýttyń ishinde pılottar ushaqty tolyq bolmasa da, belgili deńgeıde baqylaýǵa alǵan. Biraq oǵan deıin tótenshe jaǵdaı jarııalanyp úlgergen bolatyn. Olar bul kezde Portýgalııa tarapynyń qadaǵalaýynda boldy», - dep túsindirdi Pıter Foster.
Ushaqtyń jerge qonýyna Portýgalııa Áskerı áýe kúshteriniń joıǵyshtary kómektesken. Áýe kompanııasynyń ókilderi qajet bolǵanda ushaqty muhıtqa qondyrý nusqasy da qarastyrylǵanyn rastady.
«Júrgiziletin tekserý jáne onyń nátıjeleri bizdiń kelesidegi tehnıkalyq qyzmet kórsetý ortalyqtaryn tańdaýymyz úshin usynys sıpatynda bolady», - dedi kompanııa basshysy.
Eske sala keteıik, 11 qarasha kúni «Eır Astana» áýe kompanııasynyń Embraer-190 ushaǵynan Portýgalııada tehnıkalyq qyzmetten keıingi ushý kezinde tehnıkalyq aqaý tabylyp, ekıpaj Portýgalııanyń Beja qalasyndaǵy aerodromǵa qonýǵa májbúr bolǵan edi.
