Air Astana ózine salynǵan 6,7 mlrd teńge aıyppulǵa qatysty: Aqparat shyndyqqa janaspaıdy
«Air Astana naryqtaǵy ústemdilikti teris paıdalaný jáne baǵany negizsiz kóterý saldarynan avıakompanııaǵa aıyppul salyndy degen aqparat shyndyqqa janaspaıtynyn habarlaıdy.
Air Astana áýekompanııasy qurylǵan kúnnen bastap Qazaqstan Respýblıkasynyń zańnamasyna sáıkes qyzmet etip keledi. Monopolııalyq joǵary baǵalardy belgileý turǵysynda avıakompanııada júrgizilgen tekserýler men tergeýler áýe tasymaldaýshynyń jumysynda eshqandaı buzýshylyq anyqtaǵan joq. Janar-jaǵarmaıǵa alym alý «Áýe keńistigin paıdalaný jáne avıatsııa qyzmeti týraly» QR Zańynyń 76-babynda qarastyrylǵan jáne ol Qazaqstandaǵy janar-jaǵarmaı baǵasynyń qubylmalylyǵymen negizdelgen.
Qazirgi ýaqytta ákimshilik is sot qaraýynda jatyr. Sáıkesinshe, zańnamanyń buzylǵany jáne avkıakompanııanyń aıyppul tólegeni týraly aldyn ala qorytyndy jasaý sotqa qysym jasaý retinde baǵalanýy yqtımal.
Avıakompanııa óziniń bıýdjettik bólimshesin derbes zańdy tulǵa retinde bólip shyǵarýy máselesine kelsek, Air Astana munyń 2024 jylǵa deıin múmkin bolmaıtynyn rastaıdy», - delingen kompanııa málimdemesinde.
Eske salaıyq, keshe Senatta áýe kóligi máselelerine qatysty jıyn ótip, onyń barysynda Básekelestikti qorǵaý jáne damytý agenttigi men Bas prokýratýra birlesip Air Astana kompanııasyna júrgizgen tekserý nátıjesi jarııalandy.
«Birinshiden, áýe tasymaly salasynda dınamıkalyq baǵa belgileýdi qoldaný baǵytyn retteıtin normatıvtik-quqyqtyq aktilerdi ázirleýdi qamtamasyz etý eskerilgen. Sonymen qatar, monopolııaǵa qarsy zańnama talaptaryn buzý deregi boıynsha Air Astana áýe kompanııasyna qatysty ákimshilik hattama toltyrý qarastyryldy. 2022 jyldyń 12 jeltoqsanynda Air Astana kompanııasyna qatysty ákimshilik hattama toltyrylyp, 2021 jyly aıyppul somasy 4,8 mlrd teńgeni, 2022 jylǵa 1,9 mlrd teńgeni qurady. Qazirgi kezde osy boıynsha sot protsesi júrip jatyr», - degen edi Básekelestikti qorǵaý jáne damytý agenttigi Kólik jáne baılanys departamentiniń dırektory Núrgúl Jamanova.
