Air Astana men FlyArystan reıster kestesiniń qashan qalpyna keletinin habarlady
ASTANA. KAZINFORM — Air Astana jáne FlyArystan áýe kompanııalarynyń áýe kemelerinde baǵdarlamalyq qamtamasyz etýdi jańartý jumystary jedel ári qarqynda júrgizilip jatyr, dep habarlaıdy elimizdiń Azamattyq avıatsııa komıteti.
Komıtettiń habarlaýynsha, Air Astana jáne FlyArystan avıakompanııalarynyń áýe kemelerinde baǵdarlamalyq qamtamasyz etýdi jańartý jedel túrde júrgizilip jatyr.
Qazirgi ýaqytta ınjenerlik qyzmetter Air Astana jáne FlyArystan avıakompanııalarynyń KC 931 jáne FS 7063 reısterine tartylǵan eki áýe kemesinde baǵdarlamalyq qamtamasyz etýdi jańartqan.
«Qalǵan áýe kemelerinde jańartý jumystary josparly kezeń-kezeńimen jalǵasyp jatyr jáne jýyq arada tolyq aıaqtalady. Barlyq protsedýralar Airbus ushý jaramdylyǵy jónindegi dırektıvasyna qatań sáıkestikte, áýe kompanııalar mamandarynyń, Azamattyq avıatsııa komıteti men Qazaqstannyń avıatsııalyq ákimshiliginiń tikeleı baqylaýymen júrgizilýde. Barlyq qyzmetter táýlik boıy jumyldyrylyp, jańartý protsesin múmkindiginshe tez aıaqtaý jáne áýe qaýipsizdigin tolyq qamtamasyz etý baǵytynda jumys istep jatyr», delingen AAK resmı habarlamsynda.
Sondaı-aq komıtet áýe akompanııalary ushý kestesine áserin barynsha azaıtý úshin barlyq qajetti sharalardy qabyldap jatqanyn atap ótti.
Jolaýshylarǵa óz reısteriniń ózekti mártebesin áýe kompanııalarynyń resmı resýrstarynan aldyn ala tekserip otyrý usynylady.
Ushý qaýipsizdigi — basty basymdyq. Júrgizilip jatqan jumystar áýe kemeleriniń qaýipsizdigin arttyrýǵa baǵyttalǵan.
Eske sala ketsek, Air Astana reısteri ózgerip, Airbus ushaqtary kidirýi múmkin ekeni habarlandy. Oǵan Airbus ushaqtaryndaǵy baǵdarlamalyq jasaqtama jańartýy sebep bolýy múmkin.