«Air Astana» kompanııasynyń eki qyzmetkeri 5,4 mln. teńgeniń 28 planshetin urlady degen kúdikpen Almaty áýejaıynda ustaldy
ASTANA. 18 naýryz. QazAqparat - 14 naýryzda Almaty qalasy áýejaıynyń Kóliktegi ІІD Jelilik polıtsııa bólimine «Air Astana» AQ prezıdenti Pıter Foster aryzdanyp keldi. Onyń aıtýy boıynsha, 12 naýryz kúni «Air Astana» AQ áýe kemesinen ishinde jalpy quny 5 mıllıon 439 myń 507 teńge bolatyn «IPad» markaly 28 planshet bar 2 arbany belgisiz bireýler urlap ketken.
Bul týraly Kóliktegi ІІD baspasóz qyzmetinen habarlady.
15 naýryz kúni atalǵan fakti boıynsha QR QK 175-baby 4 bóliminiń «b» (urlyq) tarmaǵyna sáıkes qylmystyq is qozǵaldy.
Almaty qalasy áýejaıynyń Jelilik polıtsııa bóliminiń qyzmetkerleri aldyn ala tergeý jumystaryn júrgizý kezindegi jedel-izdestirý sharasy barysynda «Air Astana» kompanııasynyń 27 jáne 28 jastaǵy eki qyzmetkerin aýyr qylmys jasady degen kúdikpen qamaýǵa aldy.
Qazirgi ýaqytta kúdiktiler Almaty qalasy ІІD-niń ýaqytsha ustaý ızolıatorynda qamaýda. Zattaı aıǵaqtar alyndy. Tergeý jumystary júrgizilýde.
