Air Astana kompanııasynan esh shaǵym túspedi – Aqtóbe áýejaıy

AQTÓBE. KAZINFORM – Air Astana kompanııasy Álııa Moldaǵulova halyqaralyq áýejaıyna qandaı da bir shaǵym túsirmedi. Ushaq áli de Aqtóbe áýejaıynda tur. 

Álııa Moldaǵulova halyqaralyq áýejaıynyń basqarma tóraǵasy Dastan Malıevtiń aıtýynsha, Air Astana kompanııasynyń Aqtóbe – Almaty baǵytyndaǵy KC866 reısi toqtatylǵannan keıin jolaýshylarǵa qyzmet kórsetý usynysy ǵana tústi.

– 16 tamyz kúni Air Astana kompanııasynyń ushaǵyn súıreý kezinde shassıdiń tumsyq tiregindegi bekitpe zaqymdandy. Degenmen Air Astana kompanııasynan áýejaıǵa shaǵym túspedi. Kompanııa tek jolaýshylarǵa qyzmet kórsetý ótinishin aıtty. Ushaq áli áýejaıda tur, - dedi Dastan Malıev. 

Eske salsaq, Air Astana áýe kompanııasy Aqtóbeden Almatyǵa shyqqan ushaqtyń keshigýine qatysty túsinikteme berdi. Onda jolaýshylardyń bılet qunyn aıyppulsyz qaıtarý usynylǵany habarlandy. Ushaqty jóndeý úshin jolaýshylardy qaldyryp, Astanaǵa jetkizý týraly sheshim qabyldanǵan.