Air Astana Irannyń áýe keńistigin aınalyp ótip, Dýbaıǵa ushady

ASTANA. KAZINFORM –  Air Astana áýe kompanııasy Taıaý Shyǵystaǵy jaǵdaıdy muqııat taldaǵannan keıin jáne Qazaqstannyń Avıatsııalyq Ákimshiliginiń usynysy boıynsha Irannyń áýe keńistigin aınalyp ótip, Dýbaıǵa ushýdy oryndaýǵa sheshim qabyldady.

Osyǵan baılanysty Astana men Almatydan Dýbaıǵa reısterdiń baǵyttary ózgertilip, ushý ýaqyty uzarady.

«Jıddaǵa reıster ózgerissiz oryndalady, biraq óńirdegi áskerı áreketter kúsheıgen jaǵdaıda qaıta qaralatyn bolady. Qajet bolǵan jaǵdaıda áýekompanııa ushý qaýipsizdigin qamtamasyz etý úshin qosymsha ózgerister engizetin bolady», - delingen áýekompanııa habarlamasynda.

Qazaqstannyń Azamattyq avıatsııa komıteti Taıaý Shyǵystaǵy kúrdeli ahýalǵa baılanysty málimdeme jasaǵan bolatyn.