Air Astana-ǵa eki jylda 6,7 mlrd teńge aıyppul salyndy

ASTANA. QazAqparat - QR Básekelestikti qorǵaý jáne damytý agenttigi Bas prokýratýramen birlesip Air Astana kompanııasyna qatysty tekserý júrgizdi. Bul týraly Senatta elimizdegi áýe kóligi máselelerine qatysty jıyn barysynda málim boldy, habarlaıdy QazAqparat tilshisi.

Tekserý qorytyndysy boıynsha Bas prokýratýra QR Indýstrııa jáne ınfraqurylymdyq damý mınıstrligine tıisti usynysty joldady.

«Birinshiden, áýe tasymaly salasynda dınamıkalyq baǵa belgileýdi qoldaný baǵytyn retteıtin normatıvtik-quqyqtyq aktilerdi ázirleýdi qamtamasyz etý eskerilgen. Sonymen qatar, monopolııaǵa qarsy zańnama talaptaryn buzý deregi boıynsha Air Astana áýe kompanııasyna qatysty ákimshilik hattama toltyrý qarastyryldy. 2022 jyldyń 12 jeltoqsanynda Air Astana kompanııasyna qatysty ákimshilik hattama toltyrylyp, 2021 jyly aıyppul somasy 4,8 mlrd teńgeni, 2022 jylǵa 1,9 mlrd teńgeni qurady. Qazirgi kezde osy boıynsha sot protsesi júrip jatyr», - dedi Básekelestikti qorǵaý jáne damytý agenttigi Kólik jáne baılanys departamentiniń dırektory Núrgúl Jamanova.

Budan buryn habarlanǵandaı, bıyl 10-ǵa jýyq halyqaralyq baǵyt boıynsha reıster ashylmaq.

Qazirgi kezde áýe kóligi salasynda 6 qazaqstandyq tasymaldaýshy 56 ishki baǵdar boıynsha aptasyna 706 reısti oryndap keledi.