Eýropanyń kýrorttyq qalalaryna ushaq qatynaıtyn boldy
ASTANA. KAZINFORM - Air Astana áýe kompanııasy Eýropanyń kórikti qalalary Iraklıonǵa (Grekııa) jáne Podgorıtsaǵa (Chernogorııa) maýsymdyq jazǵy reısterdiń qaıta bastalatyny týraly habarlady.
«Almatydan Krıt aralynda ornalasqan Iraklıonǵa reıster 6 maýsymda dúısenbi, beısenbi jáne senbi kúnderi aptasyna 3 ret jıilikpen bastalady. Ushýlar Airbus A321LR avıalaınerinde 6 saǵat 30 mınýt ushý uzaqtyǵymen oryndalady. Qazaqstan azamattaryna Grekııaǵa kirý úshin shengen vızasy qajet. Iraklıonnan Afınaǵa jergilikti turaqty reıstermen jetýge bolady, olar shamamen bir saǵatty alady, sondaı-aq parommen tanymal Santorını araldaryna deıin jetýge bolady.
Barlyq alymdarmen eki jaqqa bılettiń eń tómengi quny ekonom-klasta 307 959 teńge» delingen habarlamada.
Sondaı-aq, áýe kompanııasy Chernogorııanyń astanasy Podgorıtsaǵa ushaqpen barý múmkin bolatynyn málimdedi.
«Almatydan reıster 8 maýsymnan bastap seısenbi, juma jáne senbi kúnderi qatynaıdy, al Astanadan Podgorıtsaǵa reıster 9 maýsymnan bastap dúısenbi, beısenbi jáne jeksenbi kúnderi júzege asyrylady. 2024 jylǵy 1 mamyrdan 31 qazanǵa deıin Qazaqstan azamattary úshin Chernogorııaǵa 30 kúnge deıin vızasyz kirýge bolady.
Almatydan Podgorıtsaǵa barlyq alymdarmen eki jaqqa bılettiń eń tómengi quny ekonom-klasta 282 551 teńgeden bastalady.
Reısterdiń ushý uzaqtyǵy A321LR ushaǵymen Almatydan 6 saǵat 55 mınýt, Astanadan 6 saǵat 30 mınýt» dep habarlady áýe kompanııasy.
Bıletterdi airastana.com áýe kompanııasynyń saıtynan, sondaı-aq Brondaý jáne aqparat ortalyǵynan, áýe kompanııanyń satý keńselerinen, týrıstik agenttikterden satyp alýǵa bolady.