Air Astana bortserikteriniń kıimi - «Áýe qarlyǵashtary» konkýrsynda úzdik úshtik qatarynda
ASTANA. QazAqparat - "Eır Astana" bortserikteriniń kıimi «Borıspol» ýkraınalyq áýejaıy uıymdastyrǵan «Áýe qarlyǵashtary» konkýrsynda ekinshi oryn aldy.
Bul týraly avıakompanııa baspasóz qyzmeti Tvıtter-akkaýntynda habarlady. "Borıspol" áýejaıy saıtynyń jazýynsha álemniń 12 elinen 16 avıakompanııa qatysqan. Jeńimpazdarǵa 4 júlde ǵana beriletindikten (jeńimpazdar úshtigi, kórermender kózaıymy nomınatsııasy), ádilqazylarǵa tańdaý jasaý qıyn soqty. Kóshbasshyny aıqyndap alǵan soń, sán men avıatsııa salasyndaǵy sarapshylar birinshi oryndy Azur Air Ukraine ýkraınalyq avıtasymaldaýshysyna, ekinshi oryndy «Air Astana» seriktes - avıakompanııa ókilderine, úshinshi oryndy - «Wind Rose» avıkompanııasyna tabystady, kórermender kózaıymy áýejaı veb-saıtyndaǵy saýalnamaǵa sáıkes «MAÝ» avıkompanııasy boldy.
Esterińizge salaıyq, «Áýe qarlyǵashtarynyń» kostıýmderin «Borıspol» áýejaıynyń basshysy Evgenıı Dyhne, Ýkraına azamattyq avıatsııasynyń bortserikteri qaýymdastyǵynyń basshysy Inna Radzıvılova, «L'OFFICIEL» jýrnalynyń bas redaktory Ana Varava, táýelsiz sarapshy - «Mıssıs Vselennaıa-2016» konkýrsynyń jeńimpazy jáne onyń nomınatsııalarynyń biri «Eń ádemi ulttyq kostıým» atalymynyń ıegeri - Olga Torner, zańdyq seriktes Ernest Gramatskıı baǵalady. Kórermenderdiń jáne uıymdastyrýshylardyń biraýyzdy sheshimimen konkýrsqa joǵary «jyl saıynǵy» atalymy berildi.
