Air Astana bas atqarýshy dırektory qyzmetinen ketetin boldy
ASTANA. KAZINFORM — Pıter Foster kompanııalar tobymen baılanysyn saqtap, dırektorlar keńesine aǵa keńesshisi retinde óz qyzmetin jalǵastyrady, dep habarlaıdy áýekompanııanyń baspasóz qyzmeti.
«Air Astana» AQ dırektorlar keńesi Pıter Foster 2026 jyldyń naýryzynyń sońynda bas atqarýshy dırektor jáne dırektorlar keńesine múshesi qyzmetterinen ketetinin habarlaıdy.
Qarjy jónindegi atqarýshy dırektor Ibrahım Janlyel osy kezeńde bas atqarýshy dırektor qyzmetine taǵaıyndalatyn bolady.
«Air Astana» AQ dırektorlar keńesiniń tóraǵasy Nurlan Jaqupov kompanııany 20 jyl boıy basqarýdaǵy eren eńbegi úshin Pıter Fosterge alǵys aıtyp, Ibrahım Janlyelge jańa qyzmetinde sáttilik tiledi.
— Dırektorlar keńesi Pıter Fosterge kompanııany 20 jyl boıy basqarýdaǵy eren eńbegi úshin shyn júrekten alǵys bildiredi. Ol kompanııany qurylǵan kezeńinen bastap búgingi tańda Qazaqstan men Ortalyq Azııanyń jetekshi áýe kompanııasyna jáne álemdik avıatsııa salasynda moıyndalǵan brendke deıin jetkizdi. Dırektorlar keńesi Ibrahım Janlyeldiń bas atqarýshy dırektor qyzmetine taǵaıyndalýyn quptaıdy. Janlyel myrza 2003 jyldan kompanııalar tobynyń quramynda jumys istep keledi: bastapqyda kommertsııalyq baǵyttaǵy basshylyq qyzmetterdi atqaryp, 2017 jyldan beri qarjy jónindegi atqarýshy dırektory laýazymyn ıelenip keledi. Onyń kompanııanyń damýyna qosqan úlesi zor, ári ol toptyń qyzmeti men jalpy avıatsııa salasy boıynsha mol tájirıbege ıe. Dırektorlar keńesi onyń basshylyǵymen kompanııanyń ósýi men jańa jetistikterge jetetinine tolyq senimdi, — dedi Nurlan Jaqupov.
Budan buryn Pıter Foster Flyarystan bıleti qunyna qatysty pikir bildirdi.