Air Astana bas atqarýshy dırektory qyzmetine nelikten Ibrahım Janlyel taǵaıyndalady

ASTANA. KAZINFORM — «Samuryq-Qazyna» qorynyń basqarma tóraǵasy Nurlan Jaqypov Air Astana bas atqarýshy dırektory qyzmetine nelikten Ibrahım Janlyel taǵaıyndalatynyn túsindirdi. 

— Bul sheshimdi Air Astana dırektorlar keńesi qabyldady. Ózderińiz biletindeı, Air Astana — bul jarııa kompanııa, onda jeke ınstorlar men sheteldik ınstıtýtsıonaldy ınvestorlar majorıtalyq aktsıoner sanalady. «Samuryq-Qazynanyń» úlesi 41 paıyz. Air Astana kompanııanyń jańa bas atqarýshy dırektory bolyp saılanǵan Ibrahım Janlyel bul laýazymǵa 2026 jyldyń 1 sáýirinen bastap kirisedi. Ol — tájirıbeli qyzmetker. Air Astana kompanııasynda 20 jyldan astam ýaqyttan beri jumys isteıdi. Áýe kompanııalaryndaǵy eńbek ótili 30 jyldan asady, — dedi ol Aqordada BAQ ókilderiniń saýalyna oraı.

Onyń atap ótýinshe, búginde Air Astana óńirdegi eń iri kompanııalardyń birine aınaldy. Kompanııada 62 áýe kemesi bar. 14 márte óńirdiń úzdik kompanııasy atanǵan.

— Bul qazirgi menedjment óz jumysyn atqaryp kele jatqanyn dáleldeıdi. Ibrahım Janlyel sońǵy 9 jyl boıy Pıter Fosterdiń orynbasary boldy. Bul laýazymǵa onyń taǵaıyndalýy Air Astana kompanııasy damýynyń sabaqtastyǵyn bildiredi. Air Astana strategııasy aıasynda bekitilgen damý baǵytyn saqtaý úshin kandıdatty ishten tańdap aldy. Oǵan bárinen de Ibrahım Janlyel laıyq boldy, — dedi Nurlan Jaqypov.

Aıta keteıik, «Air Astana» AQ dırektorlar keńesi Pıter Foster 2026 jyldyń naýryzynyń sońynda bas atqarýshy dırektor jáne dırektorlar keńesine múshesi qyzmetterinen ketetinin habarlady.