Air Astana áýe kompanııasyna 3 mln teńgeden astam aıyppul salyndy

NUR-SULTAN. QazAqparat – «Air Astana» áýe kompanııasyna bıyl jetinshi ret aıyppul salyndy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń Azamattyq avıatsııa komıtetine silteme jasap.

«2022 jylǵy 16 shildede «Air Astana» áýe kompanııasynyń «Almaty – Nur-Sultan» baǵyty boıynsha KS-853 reısi rezervtik ushý ekıpajyn kútý sebebinen 27 saǵat 21 mınýtqa keshiktirilgeni anyqtaldy. Reıstiń keshigýi kezinde jolaýshylarǵa qoldanystaǵy zańnamada qarastyrylǵan qyzmetter usynylmaǵan. Atap aıtqanda qonaqúıde turý. Osy oraıda reıstiń keshigýi kezinde jolaýshylardyń quqyǵyn buzǵany úshin bıyl 6 qyrkúıekte «Air Astana» áýe kompanııasyna 1 000 AEK (3 063 000 teńge) kóleminde aıyppul salyndy», - delingen habarlamada.

Aqparatta aıtylǵandaı, atalǵan áýe kompanııasy bıyl osymen jetinshi ret aıyppul arqalap otyr.

«Bıyl shilde aıynan bastap «Air Astana» áýe kompanııasyna (qurylymdyq bólimshesi «Fly Arystan» áýekompanııasy) qatysty jalpy somasy 7 000 AEK (21 441 000 teńge) kóleminde jeti ret aıyppul salyndy», - dep habarlaıdy vedomstvodan.

Azamattyq avıatsııa komıtetiniń málimetinshe, bıyl shildeden beri jalpy qazaqstandyq áýe kompanııalarǵa 8 000 AEK (24 504 000 teńge) kóleminde 8 ret aıyppul salynyp, ákimshilik jaýapqa tartyldy.

«Azamattyq avıatsııa komıteti júrgizilip jatqan jumys barysynda Qazaqstan Respýblıkasynyń qoldanystaǵy zańnamasynyń jolaýshylar quqyǵyn saqtaý bóligindegi talaptardy ustanady. Tasymaldaýshylar tarapynan quqyq buzýshylyq faktileri qaıtalap anyqtalǵan jaǵdaıda, tıisti sharalar qabyldanatyn bolady», - deıdi komıtetten.

Eske salsaq, bıyl shilde de Air Astana áýekompanııasy reısti keshiktirip, jolaýshylar quqyǵyn buzǵany úshin 9 mln teńge aıyppul tólegen edi.