Ulttyq Bank jalǵan nesıelik shottardy paıdalaný arqyly jasalatyn alaıaqtyq shema týraly eskertti

ASTANA. KAZINFORM –  Qazaqstan Ulttyq Banki alaıaqtardyń QUB-tyń resmı blankisin qoldanyp, jalǵan qujat usynǵan jaǵdaılar jıilep ketkenin eskertti.

— Ulttyq Banktiń atynan baılanysqa shyqqanda olar azamattarǵa «kredıttik shoty» baryn nemese kredıt qaryzyn óteý kerek ekenin habarlap, jalǵan hat jiberedi. Senimge kirý úshin jalǵan qujattarǵa Ulttyq Banktiń «ýákiletti tulǵasy» qoıǵan qolyn, aty-jóni men mórin basady. Qaskóıler mundaı jalǵan málimetterdi azamattarǵa aqsha aýdartyp, qarajatyn urlaý úshin de usynady, — dep habarlady bankten.

Sondaı-aq, olar Ulttyq Bank qyzmetkeriniń bet-beınesin qoldana otyryp, jalǵan beınerolıkter jasaý úshin jasandy ıntellekt tehnologııalaryn paıdalanady. Bul rette alaıaqtar áleýmettik jelilerde jalǵan ınvestıtsııalyq kompanııalar týraly jáne urlanǵan aqshalardy qaıtarý jóninde tegin zańgerlik kómek kórsetemiz dep jarnama ornalastyryp júr.

Osyǵan baılanysty Ulttyq Bank azamattardy qyraǵy bolýǵa, kúmándi shottarǵa aqsha jibermeýge, dáıeksiz habarlamalar men tekserilmegen qujattarǵa senbeýge shaqyrady.

— Ulttyq Bank jeke tulǵalardyń shotyna qyzmet kórsetpeıtinin, azamattarǵa kredıt berýmen aınalyspaıtynyn, zańgerlik qyzmet kórsetpeıtinin, sondaı-aq halyqpen aqshalaı esep aıyrysý júrgizbeıtinin eske salamyz, — delingen habarlamada.

Qazaqstan Ulttyq Banki úshinshi tulǵalar tarapynan jasalatyn alaıaqtyq áreketterge jol bremes úshin memlekettik organdardyń nemese Ulttyq Bank qyzmetkerleriniń atynan beıtanys adam qońyraý shalǵan kezde áńgimeni toqtatyp, qajet bolǵan jaǵdaıda memlekettik organnyń resmı nómirine óz betinshe habarlasýdy usynady.

Eske sala keteıik, Qyzylordada jyl basynan beri 118 ınternet alaıaqtyq deregi tirkeldi.