Air Astana alǵashqy IPO satylymnan 370 mln dollar tabys tapty

ASTANA. KAZINFORM – Búgin Air Astana áýe kompanııasynyń aktsııalary IPO arqyly satylymǵa shyqty.

«Qazaqstan qor bırjasynda, Astana International Exchange jáne London qor bırjasynda ótkizilgen alǵashqy IPO. IPO mámileniń jalpy mólsheri shamamen 370 mıllıon AQSh dollary (qosymsha ornalastyrý optsıony tolyq oryndalǵan jaǵdaıda). ІRO-ǵa qatysý úshin berilgen ótinimder sany qazaqstandyq ınvestorlar tarapynyń, bólshek jáne ınstıtýtsıonaldyq, sondaı-aq halyqaralyq ınvestorlar qoǵamdastyǵynyń qoldaýy arqasynda usynystan asyp tústi. Onyń 58%-y jergilikti ınvestorlar jáne 42%-y halyqaralyq ınvestorlar», - delingen Air Astana habarlamasynda.

Aqparatta aıtylǵandaı, ınvestorlardyń 97,8% ótinimi tolyq kólemde qanaǵattandyryldy.

«Bul – kompanııa tarıhyndaǵy aıtýly oqıǵa. Sebebi biz resmı túrde jarııa kompanııaǵa aınalýdamyz. ІRO qazaqstandyq ınvestorlarǵa usynylǵan baǵaly qaǵazdardyń basym bóligin qamtamasyz etý, sondaı-aq halyqaralyq naryqtarda kapıtal tartý úshin muqııat oılastyryldy. Biz buǵan ınstıtýtsıonaldyq ta, bólshek ınvestorlar da tarapynan joǵary suranystyń arqasynda qol jetkizgenimizge qýanyshtymyz. Qyzyǵýshylyq deńgeıi sonshalyqty joǵary bolǵandyqtan, suranysty qanaǵattandyrý úshin usynys kóleminiń ulǵaıýyna qaramastan, IPO-ǵa ótinimder sany usynystan birneshe ese asyp tústi», - dedi Air Astana AQ prezıdenti jáne bas atqarýshy dırektory Pıter Foster.

Eske sala keteıik, buǵan deıin Air Astana aktsııalary 15 aqpannan satyla bastaıtyny týraly habarlaǵan edik.