Air Astana aktsııasyn satyp alý zeınetaqy qoryna shyǵyn ákelgen joq — Tımýr Súleımenov

ASTANA. KAZINFORM — Ulttyq bank tóraǵasy Tımýr Súleımenov bazalyq mólsherlemege arnalǵan kezekti brıfıngide BJZQ aqshasyna Air Astana aktsııasyn satyp alý operatsııasynyń saldary jóninde pikir bildirdi.

Brıfıng barysynda BAQ ókili BJZQ aktsııalaryn satyp alǵan Air Astana-nyń qor bırjasyndaǵy quny tómendep ketkenin atap, munyń saldary qandaı bolatynyn surady.

«BJZQ Air Astana-nyń ІRO-syna 20 mlrd teńgeden sál kóbirek qarajat jumsady. Qazir ol aktsııalardyń quny satylymǵa shyqqan kezdegiden arzandap ketti. Mundaı jaıt kez kelgen aktsııanyń basynda bolady. Onyń sharttary santúrli. Dál qazir aktsııa baǵasy tómen bolyp tur. Degenmen BJZQ alyp-satýmen ǵana aınalysatyn ınvestor emes. Biz arzanǵa jyldam satyp alyp, qymbatqa satyp jiberý úshin kirmeımiz. Bizdiń ınvestıtsııalyq strategııamyz ondaı emes. Bizdiń qor úlken bolǵandyqtan uzaq merzimge ınvestıtsııa jasaımyz. Bizdiń baǵalaýymyz boıynsha da, Qazaqstandaǵy jetekshi ınvestıtsııalyq uıymdardyń da baǵalaýy boıynsha Air Astana-nyń ósý áleýeti bar. Biz áli de Air Astana-ǵa senip otyrmyz. Bizde shyǵyn tirkelgen joq. Óıtkeni shyǵyndy tirkeý úshin eseptik kún belgilenip, teńgerim júrgizilýi kerek. Biz ol jerde ósim múmkindigi zor dep esepteımiz. Jalpy BJZQ portfelinde túrli aktsııalar bar. Biraq sonyń ishinde osy jolǵy aktsııalar ǵana qyzý talqylanyp jatyr», — dedi ol.

Tımýr Súleımenov Air Astana aktsııalarynyń qubylýy BJZQ-nyń jalpy tabystylyǵyna aıtarlyqtaı áser ete almaıtynyn atap ótti. 

«BJZQ shynaıy mánde 11% tabystylyq kórsetip otyr. Sondyqtan jyl aıaǵynda eshqandaı shyǵyn bolmaıdy dep esepteımiz. BJZQ aktıvi 18,8 trln teńge ekenin eske salamyn. Al Air Astana-ǵa 20 mlrd teńgeden sál artyq aqsha salyndy. Bul 0,1%-dan da az. Sondyqtan alańdaýǵa negiz joq. Jyl qorytyndysy boıynsha BJZQ-nyń tabysy jaqsy bolady», — dedi Ulttyq bank basshysy.