Air Astana aktsııalary aqpan aıynda London qor bırjasynda satylymǵa shyǵady

ASTANA. KAZINFORM - Air Astana London qor bırjasynda (LSE), AHQO qor bırjasynda (AIX) jáne «Qazaqstan qor bırjasy» AQ-da (KASE) baǵaly qaǵazdar lıstıngin júzege asyrady.

Resmı málimet kompanııanyń saıtynda jarııalandy. 

Jyldar boıy keıinge qalyp kelgen bul naýqan 2024 jyldyń alǵashqy toqsanyna josparlanyp otyr. Kompanııa aktsııalarynyń kem degende 25 paıyzy satylymǵa shyǵady. 

London qor bırjasy men Astana halyqaralyq qarjy ortalyǵyna shyǵý ýaqyty osy jyldyń aqpanyna belgilengen. Al KASE naryǵyna búgin nemese jaqyn kúnderi shyǵady.   

«Kompanııanyń atynan „Eır Astananyń“ kópshilik qarjy naryǵyna shyǵatynyn qýana rastaımyn. Ortalyq Azııa men Kavkazdaǵy asa iri áýe kompanııasy retinde bizdiń osy saladaǵy mártebemiz, naryqtyq pozıtsııamyz jáne ósim profılimiz tartymdy ınvestıtsııalyq múmkindik bola alady dep senemin. Biz jańa qazaqstandyq jáne halyqaralyq ınvestorlardy kompanııa aktsıoneri retinde qatarymyzǵa qabyldaýǵa daıynbyz», — deıdi «Eır Astana» AQ prezıdenti jáne bas atqarýshy dırektory Pıter Foster.

Eske sala keteıik, áýe kompanııasy sheteldegi lıstıngke kómek beretin halyqaralyq keńesshi retinde Citigroup, Jefferies Financial Group jáne Wood & Co kompanııalaryn, al ishki naryqta jumys isteý úshin Halyk Finance, BCC Invest, Jusan Invest jáne SkyBridge Invest kompanııalaryn jaldaǵan bolatyn. 

Aldyn ala málimetke sensek, IPO-da kompanııa shamamen 1 mlrd dollarǵa baǵalanýy múmkin.

Onyń aıasynda brıtandyq BAE Systems qorǵanys kompanııasy men Qazaqstannyń «Samuryq-Qazyna» ulttyq ál-aýqat qory óz úlesiniń bir bóligin ınvestorlarǵa usynady.

Qazirgi ýaqytta Air Astana aktsııalarynyń 49% — BAE Systems-ke, al 51% — ulttyq ál-aýqat qoryna tıesili.

Aktsıonerler ózderiniń jalpy úlesin shamamen 50% deıin qysqartýdy josparlap otyr.

Sonymen qatar, naýqan kezinde qosymsha aktsııalar shyǵarylady.