Air Astana Airbus ushaqtaryndaǵy aqaý týraly resmı málimdeme jasady
ASTANA. QazAqparat - Qazaqstandyq Air Astana áýe kompanııasy Airbus A320neo ushaqtaryna ornatylǵan amerıkalyq Pratt & Whitney qozǵaltqyshtarynyń aqaýy týraly habarlamalarǵa jaýap berdi, dep habarlaıdy QazAqparat.
«Airbus jáne Pratt & Whitney shekteýli kólemde jetkizilgen Pratt & Whitney GTF qozǵaltqyshtarynan tabylǵan joǵary qysymdy kompressordyń artqy tireýimen baılanysty oqıǵany tekserip jatyr. Munyń operatsııalyq qyzmetke qandaı da bir yqpalyn azaıtý maqsatynda Air Astana qazirgi jaǵdaı boıynsha Airbus jáne Pratt & Whitney-men tyǵyz baılanysta jumys istep jatyr. Airbus pen Pratt & Whitney kompanııaǵa tolyq qoldaý kórsetýde», - delingen otandyq áýe kompanııasynyń baspasóz habarlamasynda.
Buǵan deıin sheteldik BAQ-tyń habarlaýynsha, Airbus kontserni Eýropalyq ushý qaýipsizdigi agenttigine qoldanystaǵy A320neo ushaqtaryna ornatylǵan 113 P&W qozǵaltqyshynyń 30%-ynda aqaý bar ekenin habarlaǵan. Sol sebepti óndirýshi klıentterge jańa ushaqtardy jetkizýdi toqtata turýǵa májbúr bolǵan. Airbus málimdeýinshe, qazirgi ýaqytta ushaqtyń bul modelin álem boıynsha 18 áýe kompanııasy qoldanady. Osy aptada Airbus A320neo ushaqtaryn shyǵarýdyń 2018 jylǵa arnalǵan josparyn jarııalaýy tıis bolatyn. Ótken jyly qozǵaltqyshtardy jetkizýdegi irkilisterden A320neo shyǵarý kólemi boljanǵan mejeden az bolǵan.
2016 jyldyń qarasha aıynda Air Astana kompanııasynyń parkine alǵashqy Airbus A320neo áýe laıneri jetkizildi. 2015 jyly Air Astana 2016-2019 jyldary Airbus A320neo 11 ushaǵyn lızıngke alý boıynsha kelisimshartqa qol qoıdy.
