Bıyl jazda Larnakaǵa maýsymdyq áýe reısteri ashylady

ASTANA. KAZINFORM – Maýsym men qyrkúıek aralyǵynda Astana men Almatydan Kıprdiń ońtústik jaǵalaýyndaǵy Larnaka qalasyna turaqty áýe reısteri ashylady. Bul týraly Kólik mınıstrliginiń baspasóz qyzmeti habarlady. 

Astanadan 2 maýsymnan 5 qyrkúıekke deıin seısenbi jáne senbi kúnderi, tańerteńgi jáne kúndizgi ýaqytta qatynaıdy, al Larnakadan qaıtý reısteri kúndiz oryndalady. Ushý uzaqtyǵy sol jaqqa – 5 saǵat 40 mın, qaıtarda – 5 saǵat 5 mın.

Almatydan 4 maýsymnan 6 qyrkúıekke deıin beısenbi jáne jeksenbi kúnderi qatynaıdy. Almatydan ushý – tańerteń, Larnakadan oralý – kúndiz. Ushý uzaqtyǵy sol jaqqa – 6 saǵat 5 mın, qaıtarda – 5 saǵat 30 mın.

Air Astana áýe kompanııasy 2026 jyldyń jazǵy kestesinde Kıprge tikeleı maýsymdyq reısterge bıletterdi satýdy bastady. Barlyq reıs Airbus A321LR zamanaýı ushaqtarymen oryndalady. 

Eske sala keteıik, buǵan deıin jańa ushaqtarmen qamtamasyz etýde qandaı problema bar ekenin jazǵan edik.