Air Arabia qazaqstandyqtarǵa ótemaqy tóleýge daıyn

  ASTANA. QazAqparat  -  Elordada QR IDM Týrızm ındýstrııasy  departamentiniń dırektory Marat Iǵalıdiń tóraǵalymen qazaqstandyq týrıstik operatorlardyń Air Arabia (BAÁ) áýe kompanııasynyń ókilderimen kezdesýi ótti, dep habarlaıdy QazAqparat.

Kezdesýge áýe kompanııasynyń Eýropa jáne TMD jónindegi óńirlik bas dırektory R.Baratan, áýe kompanııasy kommertsııalyq blogynyń jetekshisi Paýl Sımmons, QR IDM Týrızm  ındýstrııasy departamentiniń, Azamattyq avıatsııa komıtetiniń, Zańgerlik departamentiniń  ókilderi, sonymen qatar qazaqstandyq «Kazunion», KOMPAS, «Barhatnyı sezon», «Intýrıst», "Evrazııa Ekspress"  týrıstik operatorlarynyń ókilderi qatysty.

Taraptar 2016 jyldyń sońy men 2017 jyldyń basynda qazaqstandyq týrısterdiń Shardja áýejaıynan usha almaı qalý problemasyn talqylady. Arab áýe kompanııasynyń ókilderi aýra raıynyń qolaısyzdyǵy (qalyń tuman) saldarynan 17 myńnan astam jolaýshy der ýaqytynda usha almaı qalǵanyn aıtty.

Air Arabia ókilderi Shardja áýejaıynyń 2 sanatty jaryq dabyl qurylǵysy 3 sanatty jabdyqqa aýystyrylatyndyǵyn atap ótti. Sonymen qatar olar qazaqstandyq jolaýshylardyń avıabılet qunyn  óteý baǵytynda jumys júrgizýge daıyn ekendikterin bildirdi.

QR IDM Týrızm ındýstrııasy departamentiniń dırektory Marat Iǵalı bul máseleniń osy jyldyń qańtar aıynyń ortasynda Ábý-Dabıde ótken qazaqstandyq-arab úkimetaralyq komıssııasynyń 6-shy otyrysy aıasynda, joǵary deńgeıde qarastyrylǵanyn atap ótti.