AIIB Prezıdenti: Bank 2017 jyldyń basynda jańa múshelerdi qabyldaıdy

ASTANA. KazAqparat - Búgin Qytaı astanasy Beıjiń qalasynda Azııa ınfraqurylymdyq ınvestıtsııalar bankiniń (AIIB) alǵashqy jyl saıynǵy kezdesýi bastaldy, dep habarlady RIA Novostı.

Atalǵan banktiń alǵashqy jyl saıynǵy kezdesýiniń ashylý saltanatynda bank prezıdenti Tszın Lıtsıýn Azııa ınfraqurylymdyq ınvestıtsııalar banki 2017 jyldyń basynda óz qataryna jańa múshelerdi qabyldaıtyny jaıly habarlady.   

«Men bolashaqta AIIB quramyna múshe bolý úshin ótinish bildire alatyn elderdiń ókilderin shyn júrekten qoshemetteımin. Bank AIIB quramyna kirgisi keletinderdiń ótinishterin kútýde... Biz jańa múshelerdi 2017 jyldyń bas kezinen bastap qabyldaımyz», - dedi Tszın Lıtsıýn.

Onyń aıtýynsha, AIIB quramyna kirý úshin beriletin ótinishterdiń dedlaıny - 2016 jyldyń qyrkúıek aıy.

Azııa ınfraqurylymdyq ınvestıtsııa banki (Asian Infrastructure Investment Bank) quramyna 57 el kiredi. 2015 jyldyń 29 mamyrynda bankti ashý týraly kelisimge qol qoıylǵan bolatyn. Bank ınfraqurylymdyq jobalardy qarjylandyrý úshin qurylǵan. Onyń jarǵylyq kapıtaly 100 mıllıard dollardy quraıdy. Bank dırektorlar keńesiniń negizgi daýystary Qytaı, Úndistan jáne Reseı sııaqty elderge tıesili.