AIF aıasynda 800 mln astam dollarǵa ınvestıtsııalyq kelisimder bekitildi
ASTANA. KAZINFORM — Sonymen birge, Astana ákimdiginiń aldyn ala baǵalaýynsha, forým kúnderi elordaǵa 5 myńnan astam sheteldik qonaqtyń kelýi qonaq úıler, meıramhanalar, kólik qyzmetteri jáne qalanyń basqa da salalary úshin 2,6 mlrd teńge tabys ákeldi.
Astana halyqaralyq forýmy qarsańynda ótken «Qazaqstan — Frantsııa» jáne «Qazaqstan -Italııa» bıznes-forýmdarynda, sondaı-aq AIF 2025 alańdarynda elimiz úshin mańyzdy birqatar ınvestıtsııalyq kelisimge qol qoıyldy.
Qazaqstan — Frantsııa bıznes-forýmy aıasynda energetıka, densaýlyq saqtaý, logıstıka, agroónerkásip, bilim berý jáne ornyqty damý salalaryn qamtıtyn 15 kelisim jasaldy. Olardyń ishinde Pavlodar qalasynda sýtegin óndiretin qondyrǵy salý jobasy bar. Bul jobaǵa 90 mıllıon eýrodan astam ınvestıtsııa tartylmaq.
Al Qazaqstan — Italııa bıznes-forýmynda jalpy somasy 180 mıllıon eýro bolatyn 10 kelisimge qol qoıyldy. Onda logıstıka, mashına jasaý, aýyl sharýashylyǵy ónimderin qaıta óńdeý, ónerkásipti tsıfrlandyrý jáne «jasyl» energetıka salalaryndaǵy jobalar qamtylǵan.
AIF-2025 alańynda da iri kelisimder jasaldy. Syrtqy ister mınıstrliginiń Investıtsııalar komıteti men «Kazak Protein» JShS Túrkııanyń Tiryaki Agro, Qatardyń Hassad Food kompanııalarynyń qatysýymen jáne KAZAKH INVEST ulttyq kompanııasynyń qoldaýymen Astana qalasynda dándi-daqyldardy tereń óńdeıtin keshen salý jóninde 320 mıllıon AQSh dollary kólemindegi ınvestıtsııalyq kelisimshartqa qol qoıdy.
Sonymen birge, KAZAKH INVEST ıtalııalyq seriktestermen taǵy 3 kelisim jasasty. Olardyń qatarynda Túrkistan oblysynda TRAMITE Group júzege asyratyn 180 mıllıon dollarlyq agroónerkásip jobasy bar. Joba jylyjaı kesheni, qyzanaq óńdeý zaýyty, jońyshqa túıirshikteý júıesi jáne basqa da ınfraqurylymdardy qamtıdy.
Qarjylyq qujattarmen qatar, AIF-2025 aıasynda Qazaqstan ekonomıkasy úshin strategııalyq mańyzy bar birqatar kelisimge qol qoıyldy.
Qazaqstan Respýblıkasy Úkimeti men Ekonomıkalyq yntymaqtastyq jáne damý uıymy (EYDU) Eýrazııalyq básekege qabilettilik baǵdarlamasyn qarjylandyrý jónindegi kelisimge qol qoıdy. Qujat ekonomıkalyq reformalardy tıimdi júrgizýge arnalǵan saraptamalyq qoldaýdy kózdeıdi. Bul baǵdarlama EYDU standarttaryn engizý, quqyqtyq jáne ınstıtýtsıonaldyq ortany jetildirý jáne óńirdiń básekege qabilettiligin arttyrýǵa serpin beredi.
Tsıfrlyq damý, ınnovatsııalar jáne aeroǵarysh ónerkásibi mınıstrligi Solana Foundation jáne Intebix kompanııalarymen Ortalyq Azııadaǵy alǵashqy blokcheın aımaǵy — Solana Economic Zone Kazakhstan jobasyn iske qosý týraly memorandýmǵa qol qoıdy.
Sondaı-aq Saýda jáne ıntegratsııa mınıstrliginiń qoldaýymen Almaty oblysynda Qazaqstandaǵy birinshi halyqaralyq aýtlet-ortalyq salý jóninde kelisimge qol qoıyldy. Keshenniń jalpy aýmaǵy 80 myńnan 120 myń sharshy metrge deıin bolmaq.
Eske sala ketsek, 29-30 mamyr kúnderi elordada Astana halyqaralyq forýmy (AIF) ótti.