Aıda Sarabaevanyń máıiti Astanaǵa jetkizildi
ASTANA. QazAqparat - Túrkııada jol apatynan kóz jumǵan 18 jastaǵy qazaqstandyq Aıda Sarabaevanyń múrdesi elge jetkizildi, dep habarlaıdy 24.kz.
«Búgin Aıda Sarabaevanyń denesi Astanaǵa jetkizildi. Aıdanyń ákesi áýejaıda kútip aldy», - dep jazdy óziniń Twitter-degi mıkroblogynda QR SІM-niń resmı ókili Altaı Ábıbýllaev.
Esterińizge sala keteıik, Túrkııanyń Denızlı qalasynyń mańynda TMD elderinen barǵan saıahatshylar avtobýsy jol-kólik apatyna ushyraıdy. Sońǵy málimetter boıynsha 4 adam qaıǵyly oqıǵa qurbany boldy: 3 reseılik jáne bizdiń otandasymyz - qaraǵandylyq Aıda Sarabaeva. Apat qolaısyz aýa raıynan jáne jyldamdyqty joǵarylatýdan boldy dep boljanýda. Sot sheshimi shyqqanǵa deıin avtobýs júrgizýshisi qamaýǵa alyndy. Eger ol kináli dep tanylsa, birneshe jylǵa sottalýy múmkin.
