Aıda Balaevanyń atynan tólemder taǵaıyndaý týraly taraǵan aqparat - feık
ASTANA. KAZINFORM – Áleýmettik jelilerde QR Mádenıet jáne aqparat mınıstri Aıda Balaevanyń sýretimen jalǵan jarnama tarady. Mátinde Memleket basshysy qazaqstandyqtarǵa tólemder taǵaıyndaýdy tapsyrǵany aıtylǵan. Bul aqparattyń feık ekenin stopfake.kz saıty jazdy.
«Jalǵan jarnamany taratýshylar kúmándi silteme boıynsha ótýdi usynady. Qandaı soma taǵaıyndalǵanyn bilý úshin adam jeke tulǵanyń biregeı nómirin (JSN) engizýge tıis. Belgisiz saıttarda jeke derekterdi qaldyrmaǵan jón. Alaıaqtar olardy jeke maqsatta paıdalanady. Qazaqstan Prezıdenti Qasym-Jomart Toqaevtyń resmı saıtynda tólemder týraly aqparat bolmaǵan jáne joq» — delingen habarlamada.
Sondaı-aq, QR Mádenıet jáne aqparat mınıstrligi de barlyq jańalyqtardy resmı portalda jarııalaıdy. Onda da tólemder týraly aqparat bolǵan joq.
«Mundaı habarlamaǵa senbegen jón. Bul alaıaqtardyń isi. Buǵan deıin Jelide QR Qarjy mınıstrligi men Ulttyq qordyń atynan tólenetin tólemder týraly osyndaı feık aqparattar taraǵan bolatyn» — dep jazdy stopfake.kz. saıty.
