Aıda Balaeva jýrnalıstıka fakýltetinde «medıa jáne aqparattyq saýattylyq» pánin engizýdi usyndy
Bul týraly búgin medıa salasynyń mamandaryn daıyndaıtyn joǵary oqý oryndarynyń rektorlarymen kezdesken QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.
«Sonymen qatar joǵary oqý oryndaryndaǵy jas mamandardy naqty sala, atap aıtqanda, aýyl sharýashylyǵy, ekonomıka, qarjy, medıtsına, ekologııa salalary jáne basqa da baǵyttar boıynsha daıyndaý isine kóp syn aıtylady. Bul oraıda mınıstrlik medıa sala mamandaryn daıyndaý, qaıta daıarlaý jáne biliktiligin arttyrý boıynsha arnaıy joba ázirlep otyr. Munan bólek bilim berý júıesiniń bilim berý deńgeıi men tıimdiligin arttyrý úshin jyl saıyn stýdentter arasynda «Úmit» shyǵarmashylyq baıqaýyn ótkizý josparlanyp otyr», - dedi Aıda Balaeva.
Onyń atap ótýinshe, medıa saýattylyq máselesi de búgingi kúnniń kókeıtesti máselesine aınalǵan.
«Sebebi búgingi ınternet zamany, túrli áleýmettik jeliler kóptegen jalǵan aqparattyń, zerttelmegen taqyryptyń taralýyna sebep bolyp jatady. Osy oraıda elimizdegi joǵarǵy oqý oryndarynda jýrnalıstıka fakýltetinde «medıa jáne aqparattyq saýattylyq» pánin engizýdi usynamyn. Baspasóz qoǵamnyń aınasy bolsa, jýrnalıst sol qoǵamǵa aqparatty jetizetin tulǵa. Sondyqtan qoǵamnyń mádenıetin kóterip, talǵamyn qalyptastyrý, saýatyn arttyrý tilshiler qaýymyna artylatyn senim men mindet desek artyq aıtqanym emes. Osy oraıda biz bir kelisimge kelip, oń nátıjelerge qol jetkizýge, birge qyzmet etýge aldaǵy ýaqytta da daıyndyz», - dedi mınıstr.
