Aıda Balaeva jýrnalısterdiń mártebesi týraly zań jobasyna qatysty aıtty

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva jýrnalısterdiń mártebesi týraly zań jobasy qashan talqylaýǵa shyǵarylatynyn aıtty, habarlaıdy QazAqparat tilshisi.

«Jýrnalısterdiń quqyǵy men áleýmettik mártebesi týraly zań jobasyn ázirleý máselesi qarastyrylyp jatyr. Nurtóre Júsip myrza jýrnalısterge úı alý nemese basqa jaǵdaılarda jeńildik jasaý týraly aıtyp otyr ǵoı. Bul jumys barlyq memlekettik mekememen kelise otyryp iske asatyn dúnıe ekeni belgili. Ol kisi mınıstrlikpen qoıan-qoltyq jumys istep otyr. Al zań jobasynyń mátinin úkimettik emes uıymdarmen, sarapshylarmen keńesip jazamyz. Qujat jobasyn keler jyldyń alǵashqy jartyjyldyǵynda ashyq talqylaýǵa shyǵaramyz dep oılap otyrmyz», – dedi mınıstr qazaq tilinde kontent jasaýshylar forýmynda tilshilerge bergen suhbatynda.

Atalmysh sharada vedomstvo basshysy otandyq telearnalar men baǵdarlamalardyń reıtıngileri live-rejımge shyǵarylatynyn atady.

«Buǵan deıin qoǵam tarapynan medıa ólsheý júıesin jetildirý týraly usynystar aıtylǵan bolatyn. Osy oraıda, biz osy aıdan bastap mınıstrliktiń saıtynda zamanaýı IP tehnologııalardy paıdalana otyryp, jańa júıeni iske qostyq. Onyń negizinde, qyzyǵýshylyq tanytqan kez kelgen azamat barlyq qazaqstandyq telearnalar men baǵdarlamalardyń reıtıngilerin live-rejımde kóre alady. Qazir otandyq kontentti qaraýshylar úlesi úlken qarqynmen ósip keledi. Búginde Qazaqstan medıa naryǵyndaǵy shet eldik jáne otandyq arnalar reıtıngisinde úzdik TOP-10-dyqty bizdiń otandyq telearnalar ıelendi. Munyń ózi bizdiń ulttyq teleónimderdiń básekege qabiletiniń jyldan-jylǵa artyp kele jatqanyn kórsetedi», - dedi mınıstr.