Aıda Balaeva jýrnalısterdi kásibı ádep normalaryn saqtaýǵa úndedi
ASTANA. KAZINFORM — Mádenıet jáne aqparat mınıstri Aıda Balaeva jýrnalısterdi kásibı ádep normalaryn saqtaýǵa shaqyrdy.
Mınıstr bul týraly Facebook paraqshasynda jazdy.
Ol keıingi kúnderi Quryltaıdyń birqatar depýtattaryna qatysty, onyń ishinde turǵyn úı máselesine baılanysty túrli alypqashpa áńgimeler men orynsyz pikirler aıtylyp, onyń sońy býllıngke ulasyp bara jatqanyn atap ótti.
— Túsinbeýshilikke jol bermeý úshin memlekettik organdardyń ókilderi men Quryltaı depýtattary BAQ ókilderin qyzyqtyrǵan máseleler boıynsha múmkindiginshe qajetti túsinikteme berýge tıis, — dep jazdy Aıda Balaeva.
Onyń aıtýynsha, Memleket basshysy mádenıet jáne medıa salasy qyzmetkerleriniń turǵyn úı máselesin júıeli túrde sheship keledi.
Mınıstr jýrnalısterge baspana berý tártibine de toqtaldy. Alǵashqy jyldary jýrnalısterge páterler redaktsııalar usynǵan tizimder boıynsha berilgen. Keıingi jyldardan bastap turǵyn úı berý qaǵıdalaryna sáıkes, baspana menshiginde jyljymaıtyn múlki joq sala qyzmetkerlerine ǵana berilip kele jatqanyn túsindirdi.
— Sonymen qatar kásibı jýrnalıst jumysynyń basty ólshemderiniń biri — jýrnalıstik ádepti saqtaý. Qýdalaý, jeke basqa tıisý, aıla-sharǵy jasaý, eleń etkizer taqyryp úshin ádeıi arandatý kásibı jýrnalıstke jaraspaıdy, — dedi mınıstr.
Aıda Balaeva «Mass-medıa týraly» Qazaqstan Respýblıkasy Zańynyń 26-baby 4-tarmaǵyna sáıkes kásibı ádep normalaryn saqtaý jýrnalıstiń mindeti ekenin eske saldy.
— Mundaı talap álemniń barlyq elindegi jýrnalısterge qoıylady. Syılastyq sapaly jýrnalıstıkanyń damýyna árdaıym yqpal etedi, — dep atap ótti ol.
Aıta keteıik, buǵan deıin, Aıda Balaeva Quryltaı qarsańynda jýrnalıster men blogerlerdiń quqyqtaryn túsindirgen edi.
