ShQO-da júk kólikteri bir aı boıy jolǵa shyǵa almaıdy
ÓSKEMEN. KAZINFORM — Shyǵys Qazaqstan oblysynda 1 aıdan astam ýaqytqa júk kólikteriniń qozǵalysyna shekteý engizildi.
Oblystyq polıtsııa departamenti baspasóz qyzmetiniń málimetine súıensek, 23 naýryzdan bastap óńir joldarynda aýyr júk kólikteriniń qozǵalysyna ýaqytsha shekteýler engizildi. 1 mamyrǵa deıin sozylatyn bul shekteý kóktemgi qar erý kezeńinde jol jamylǵysyn saqtaý maqsatynda qolǵa alynyp otyr.
Mamandardyń aıtýynsha, bul kezeńde joldardyń negizi shamadan tys ylǵaldaný saldarynan álsirep, aýyr salmaqtyń áserinen búliný qaýpi artady. Osyǵan baılanysty bir oske túsetin júktemesi 8 tonnadan asatyn júk kólikterine shekteý qoıyldy.
Bul rette halyqaralyq tasymaldarǵa, jolaýshylar kóligine, áleýmettik mańyzy bar júkterdi, atap aıtqanda azyq-túlik, dári-dármek jáne tótenshe jaǵdaılar saldaryn joıýǵa qajetti júkterdi tasymaldaýǵa shekteýler qoldanylmaıdy.
Eske salsaq, osyǵan deıin Shymkentte búlingen jol kólikterge zaqym keltirgeni jaıly jazǵanbyz.
