Aıda Balaeva: Jastar – elimizdiń eń basty jasampaz kúshi
ASTANA. KAZINFORM — Premer-mınıstrdiń orynbasary – Mádenıet jáne aqparat mınıstri Aıda Balaeva Halyqaralyq jastar kúnimen quttyqtady.
— Barshańyzdy Halyqaralyq jastar kúnimen shyn júrekten quttyqtaımyn. Jastar — elimizdiń eń basty jasampaz kúshi. Búginde Qazaqstanda 5,8 mıllıonnan astam jas azamat turady. Bul — el halqynyń úshten birine jýyq bóligi. Qazaqstannyń erteńi, memlekettiń aldaǵy damý baǵyty eń aldymen búgingi jas urpaqtyń bilimine, biligine, azamattyq ustanymy men bastamashyldyǵyna baılanysty.
Adamı kapıtaldy damytý, bilim men ǵylymdy órkendetý, ınnovatsııany qoldaý Qazaqstan Respýblıkasynyń jańa Konstıtýtsııasynda memleketti damytýdyń negizgi basymdyqtarynyń biri retinde aıqyndaldy. Bul jastarǵa úlken múmkindik berip qana qoımaı, olarǵa artylǵan senim men jaýapkershiliktiń de joǵary ekenin kórsetedi. Endigi mindet — osy múmkindikti tıimdi paıdalanyp, bilim men eńbekti serik etip, Ádiletti Qazaqstandy birge qalyptastyrý, — dedi ol.
Memleket basshysynyń bastamasymen jastar saıasatyna tyń serpin berildi. Jastar sanatyna jatatyn azamattardyń jasy 35-ke deıin ulǵaıtylyp, memlekettik qoldaý sharalarymen qamtylatyn azamattardyń qatary edáýir keńeıdi.
— Búginde jastardyń sapaly bilim alýyna, jumysqa ornalasýyna, kásip bastaýyna, baspanaly bolýyna, volonterlik qyzmetpen aınalysýyna jáne qoǵamdyq bastamalarǵa belsene aralasýyna jan-jaqty jaǵdaı jasalyp keledi. Bul jumystyń naqty nátıjeleri de bar.
«Naýryz» jáne «Otaý» jeńildetilgen nesıe baǵdarlamalary arqyly 5,4 myńnan astam jas qazaqstandyq memlekettik qoldaýǵa ıe boldy. Óńirlik turǵyn úı baǵdarlamalarynyń aıasynda 7,2 myńnan astam jas otbasy men jas maman baspanaly boldy. Bıyl «Jasyl el» jobasy boıynsha 35 myńnan astam jas maýsymdyq jumyspen qamtyldy, — dedi Aıda Balaeva.
Daryndy ári talapty jastardy qoldaý isi de júıeli túrde jalǵasyp keledi. Jyl saıyn «Táýelsizdik urpaqtary» granty jas azamattardyń tyń jobalary men bastamalaryn júzege asyrýǵa múmkindik beredi. Al memlekettik «Daryn» jastar syılyǵy óz salasynda úzdik nátıje kórsetken jańa býyn ókilderine tabystalady.
— Jastardyń el ómirine belsendi aralasýynyń mańyzy erekshe. Búginde myńdaǵan jas volonterlikpen aınalysyp, áleýmettik bastamalardy júzege asyryp, «Taza Qazaqstan» jobasyna atsalysyp júr. Osyndaı naqty ister arqyly olar qoǵamnyń damýyna, el birligi men ortaq qundylyqtardyń nyǵaıýyna óz úlesin qosýda.
Qazir elimizde 400-den astam jastar uıymy jáne 235 jastar resýrstyq ortalyǵy jumys isteıdi. Bul uıymdar jastardyń bastamalaryn qoldaýǵa, olardyń qabileti men áleýetin ashýǵa, qoǵam ómirine belsendi aralasýyna múmkindik berip otyr.
Qazaqstan búginde tsıfrlyq damý, jańa tehnologııalar men jasandy ıntellektini keńinen engizý kezeńine qadam basty. Bul úderiste jastardyń róli aıryqsha. Jańa tehnologııany ıgerý, tyń ıdeıa usyný, otandyq ǵylym men tehnologııalyq kásipkerlikti damytý arqyly jas urpaq elimizdiń básekege qabilettiligin arttyrýǵa zor úles qosa alady, — dedi ol.
Alda elimiz úshin asa mańyzdy tarıhı kezeń — Quryltaı saılaýy tur. Partııalyq tizimderde jas kandıdattardyń az emes ekeni erekshe qýantady. Bul jastardyń azamattyq belsendiligi artyp, el bolashaǵyna jaýapkershilikpen qaraýǵa jáne memleket damýyna tikeleı atsalysýǵa daıyn ekenin kórsetedi.
— Qadirli jastar! Sizderdiń bilimderińiz ben jigerlerińiz, jaýapkershilikterińiz ben jańalyqqa umtylystaryńyz — Qazaqstannyń keleshegine salynǵan eń úlken kapıtal. Biz sizderge senemiz, jetistikterińizdi maqtan tutamyz jáne árbir ıgi bastamalaryńyzdy qoldaımyz.
Aldaryńyzdan árdaıym jańa múmkindikter ashylyp, armandaryńyz oryndala bersin. Sizderdiń árbir tabystaryńyz elimizdiń ortaq jetistigine aınalsyn! Halyqaralyq jastar kúni qutty bolsyn, — Aıda Balaeva.
Aıta ketelik elimizdegi jastar sany 6 mıllıonǵa jýyqtady.
