Aıda Balaeva Ystanbuldaǵy qazaq dıasporasynyń belsendi ókilderimen kezdesti
Sapardyń alǵashqy kúni ol Ystanbulda turatyn qazaq dıasporasynyń belsendi ókilderimen kezdesti. Túrkııadaǵy aǵaıynnyń jaǵdaıy men keleshegi, qazaq tilin oqytý máseleleri jáne dıasporanyń qazaq-túrik yntymaqtastyǵyn damytýdaǵy roli sóz bolǵan jıynǵa Qazaqstannyń Túrkııadaǵy Elshisi Abzal Saparbekuly men Ystanbuldaǵy Bas konsýly Álim Baıel de qatysty.
Shetelde turatyn etnıkalyq qazaqtarǵa Qazaqstanda bólinetin granttar, Otandastar qory arqyly syrttaǵy qazaq dıasporasyna kórsetiletin qoldaý týraly aıtyp bergen Aıda Balaeva el táýelsizdiginiń 30 jyldyǵyna oraı Dúnıejúzi qazaqtary kishi quryltaıynyń bıyl Ystanbulda ótetinin jetkizdi. Jergilikti qazaqtardyń pikirlerin tyńdaǵan A. Balaeva olardyń usynysy men ótinishi boıynsha tıisti jumystyń júrgiziletinin aıtty.
Sonymen qatar, Qazaqstannan kelgen delegatsııa Túrkııanyń Memlekettik radıo jáne telearna kompanııasynyń Ystanbulda ornalasqan telehıkaıa túsirý platformasyna bardy. Mınıstr Aıda Balaeva men delegatsııa músheleri álemge áıgili túrik tarıhı telehıkaıalaryn túsirýdiń zamanaýı tehnologııalarmen tanysty.
Túrik telehıkaıalarynyń halyqaralyq naryqta úlken suranysqa ıe bolyp otyrǵanyn atap ótken Balaeva aldaǵy ýaqytta túrki tarıhynyń ortaq betterine qatysty týyndylardy birlesip túsirýdiń mańyzdylyǵyna toqtaldy. Óz kezeginde, túrik tarapy qazaqstandyq daryndy akter, kompozıtor, rejısser jáne kaskaderlarmen yntymaqtastyqtyń ornatylǵandyǵymen, ony ári qaraı damytýǵa múddeli ekendikterimen bólisti, atajurt Qazaqstandaǵy tabıǵattyń fılm jáne telehıkaıa túsirýge óte qolaıly ekendigin atap ótti.
