Aıda Balaeva: Ulttyq jańǵyrý – ozyq sanany damytý arqyly ulttyń ozat bolmysyn qalyptastyrý úshin qajet
«Ózderińiz bilesizder, osydan birer apta buryn Memlekettik hatshynyń tóraǵalyǵymen ótken komıssııa otyrysynda «Rýhanı jańǵyrý» baǵdarlamasynyń jańa baǵyty – ulttyq jańǵyrý kezeńine ótý týraly sheshim qabyldandy. Bul el Prezıdenti Qasym-Jomart Kemeluly aıtqan, azamattardyń ozyq sanasyn damytý arqyly ulttyń ozat bolmysyn qalyptastyrý úshin qajet tarıhı qadam boldy», - dedi mınıstr Senatta «Ulttyq qundylyqtar – rýhanı jańǵyrýdyń negizi» taqyrybyndaǵy dóńgelek ústel otyrysynda.
Onyń aıtýynsha, endigi jerde – rýhanııatty dáripteý jalpylaı emes, maqsatty túrde, azamattarymyzdyń jas erekshelikterin eskere otyryp júzege asyrylatyn bolady.
«Onda da, tozyǵy jetken emes, zamannyń básekesine, adamnyń qajetine jaraıtyn jasampaz qundylyqtar bolýy shart. Bul turǵyda, «Rýhanı jańǵyrý» baǵdarlamasy «tulǵalyq damý», «ulttyq biregeılik jáne halyqaralyq mártebe», «memlekettiń, azamattyq qoǵamnyń jáne jergilikti qaýymdastyqtardyń damýy» degen úsh qundylyqqa negizdeledi. Dese de, osynyń barlyǵyn iske asyrýda biz qaıtarymy mol, tıimdiligi bıik, keleshegi kemel maqsat qoıa bilý mańyzdy. Sondyqtan da, rýhanı jańǵyrý úrdisin eń aldymen bala tárbıesi men jastardyń rýhanı ósýinen bastaýymyz kerek», - dedi A. Balaeva.
«Jasyratyny joq, búgingi kúngi bala tárbıesine, olardyń oı qalyptastyrýyna – vırtýaldy álemniń, baqylaýdan tys ınternettiń yqpaly óte zor. Ókinishke qaraı, jasóspirimder arasynda bir-birine, aınalaǵa, janýarlarǵa degen qatygezdikke beıimdik, sýıtsıd, toleranttyqtyń tómendigi sııaqty túrli keleńsizdikterge jıi kýá bolyp júrmiz. Árıne, bunyń bári birjaqty qaraıtyn dúnıe emes. Keshendi zertteýdi talap etedi. Biraq, onyń túp negizinde – qoǵamdyq qadaǵalaý men ulttyq tárbıeniń róli zor dep sanaımyz. Sebebi árbir oryn alǵan kemshilik – búkil qoǵamnyń ortaq kórsetkishi», - dedi vedomstvo basshysy.
Sondyqtan jas urpaqtyń boıyna ulttyq qundylyqtardy sińire otyryp, búgingi zamanǵa saı tárbıe men bilim berý – basty mindet.
«Halqymyzdyń ulttyq tárbıesi – qashanda jas urpaqty jańashyldyqqa, eljandylyqqa baýlyǵan. Osy oraıda, qazir bizdiń mınıstrliktiń bastamasymen Balalar men jasóspirimderdi rýhanı-adamgershilikte tárbıeleý strategııasyn jasap, iske asyrý kózdelip otyr. Ol úshin mınıstrlik janyndaǵy Qoǵamdyq damý ınstıtýtynda arnaıy jumys toby quryldy», - dedi mınıstr.
