Aıda Balaeva: Ulttyq keńestiń basty eńbegi – saıası reformalar toptamasy

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva byltyr qurylǵan Ulttyq qoǵamdyq senim keńesiniń bir jyldan astam ýaqyttyń ishindegi jumysyn qorytyndylady. QR Prezıdenti Teleradıokesheniniń YouTube arnasyndaǵy «Balaevaǵa 3 suraq» baǵdarlamasynyń 6-shyǵarylymynda mınıstr Ulttyq keńestiń basty eńbegi, jospary men keleshegi týraly oıymen bólisti, dep habarlaıdy QazAqparat tilshisi.

Mınıstr Ulttyq qoǵamdyq senim keńesi qurylǵannan beri bir jyldan endi asqanyn eske saldy. Osy ýaqyt ishinde qoǵamdy eleń etkizgen birshama sharýa atqarylylǵan. Eń negizgi nátıje retinde – saıası reformalar toptamasyn aıtýǵa bolady. Atap aıtqanda «Beıbit jınalystardy uıymdastyrý jáne ótkizý tártibi týraly» jańa zań qabyldanyp, «Saıası partııalar týraly», «Saılaý týraly», «Parlament jáne onyń depýtattarynyń mártebesi týraly» zańdarǵa ózgerister engizilgen. Qylmystyq kodekstiń 130-baby qylmys sanatynan alynyp tastalyp, Ákimshilik kodekske aýystyrylǵan. 174- baptaǵy bas bostandyǵyna aıyrý jazasy – aıyppul salýmen almastyrylǵan. «Ardagerler týraly» jańa zań qabyldanyp, syrtqy qaryz biryńǵaı reestri bekitildi. Sheteldik jumys kúshine kvota eki esege qysqardy. Aýyl sharýashylyq jerlerin tıimdi paıdalaný boıynsha kosmostan monıtorıng jobasy júzege asyp, memleket menshigine 7 mln ga paıdalanylmaıtyn jaıylym qaıtaryldy.

«Ulttyq qoǵamdyq senim keńesi bizdiń qoǵamda oı erkindigi men pikir alýandyǵyna shekteý joq ekenin kórsetti. Árıne, keńes óz jumysyn «Halyq únine qulaq asatyn memleket» qaǵıdasymen alda jalǵastyra beretin bolady. Ýaqyt talabyna saı, onda kóteriletin máseleler, usynystar únemi jańaryp, jańǵyryp otyrady. Mysaly, jaqynda Ulttyq keńes músheleriniń usynysymen mádenı-rýhanı máselelerdi damytý baǵytynda jańadan top qurylatyn bolady. ıAǵnı, Keńes jumysy, tek belgili salalarda ǵana shektelip qalmaıdy. Ol qoǵamnyń barlyq salasyndaǵy kókeıtesti máselelermen aınalysady», - deıdi Aıda Balaeva baǵdarlama barysynda.