Aıda Balaeva tótenshe jaǵdaı kezinde qalaı keńes alýǵa bolatynyn túsindirdi
NUR-SULTAN. QazAqparat - QR Prezıdentiniń kómekshisi — Prezıdent Ákimshiligi ótinishterdi qaraýdy baqylaý bóliminiń meńgerýshisi Aıda Balaeva tótenshe jaǵdaı kezinde qalaı keńes alýǵa bolatynyn túsindirdi, dep habarlaıdy QazAqparat tilshisi.
«Tótenshe jaǵdaı rejıminde qazaqstandyqtardyń kópshiligin zańgerlik kómek, jumyspen qamtý, materıaldyq ótemaqy alý syndy keń aýqymdy qamtıtyn máselelerge qatysty keńesti qajet etedi. Bul saýaldardyń jaýabyn memlekettik organdardyń is júzinde táýlik boıy jumys isteıtin koll-ortalyqtaryna júginý arqyly alýǵa bolady. Máselen,sońǵy birneshe táýlikte Ádilet mınıstrliginiń ǵana koll-ortalyǵyna 3 myńnan astam azamat júgindi. Adamdardyń ózdiginen saýatty keńes alý úshin mamandarǵa baılanysýy, sol arqyly qatelikterdiń nemese bireýlerdiń astyrtyn áreketine qurban bolmaýy qýantady. Qalǵan azamattarymyzdyń da memlekettik organdar konsýltatsııalyq kómek berýge daıyn ekendigin qaperde ustaýy barynsha mańyzdy», - dep jazdy Aıda Balaeva Facebook paraqshasynda.
Onyń atap ótýinshe, qazirgi jaǵdaıda halyq tarabynan túrli sıpattaǵy máseleler týyndaıdy.
«Kóptegen qazaqstandyqtar abyrjý, alańdaý jáne sasqalaqtaý jaǵdaıynda júrgendigi tań qalarlyq jaıt emes. Biraq, barlyq memlekettik organdar kúsheıtilgen rejımde jumys istep jatyr. Eń bastysy memleket jarııa etken sharalar qazaqstandyqtardyń kúrdeli jaǵdaıdan myqty ári uıymshyl bolyp shyǵýyna kómektesedi. #BizBirgemiz», - dedi ol.
