Túrki elderi jasandy ıntellekt pen tsıfrlyq qaýipsizdik máselelerin talqylady
ASTANA. KAZINFORM — Qaýipsizdik Keńesi tóraǵasynyń orynbasary Aıda Balaeva Túrki memleketteri uıymy qaýipsizdik keńesteri hatshylarynyń besinshi otyrysyna qatysty. Bul týraly Aqordanyń baspasóz qyzmeti habarlady.
Bakýde ótken is-shara aıasynda zamanaýı syn-qaterlerge qarsy turýdyń ózekti aspektileri jáne TMU sheńberinde yntymaqtastyqty odan ári nyǵaıtý keleshegi qaraldy.
Jıynǵa qatysýshylar Taıaý Shyǵystaǵy oqıǵalardyń Uıym qaýipsizdigine áseri týraly pikir almasyp, usynystaryn jetkizdi.
TMU elderiniń ulttyq qaýipsizdigi turǵysynan jasandy ıntellekt salasyndaǵy memleket múmkindikterin damytý máseleleri jan-jaqty talqylandy.
Qazaqstan Qaýipsizdik Keńesi tóraǵasynyń orynbasary geosaıası turaqsyzdyq beleń alǵan jáne halyqaralyq qaýipsizdiktiń jańa syn-qaterleri kóbeıgen kezde túrki memleketteri arasyndaǵy yqpaldastyqty kúsheıtýdiń mańyzyn atap ótti.
Otyrysta tsıfrlyq qaýipsizdik salasyna erekshe nazar aýdaryldy. Oǵan Qazaqstannyń Kıberqaýipsizdik Keńesin, sondaı-aq Túrki memleketteriniń jasandy ıntellekt ortalyqtarynyń jelisin qurý týraly bastamalary eleýli úles qosa alady. Túrki elderiniń tıisti vedomstvolary arasynda ózara is-qımyldyń naqty tetikterin damytýǵa nazar aýdaryldy.
Sondaı-aq Aıda Balaeva jıyn aıasynda Ázerbaıjan Prezıdenti janyndaǵy Qaýipsizdik Keńesiniń Hatshysy Ramıl Ýsýbovpen, Qyrǵyzstan Qaýipsizdik Keńesiniń Hatshysy Adılet Orozbekovpen, Túrkııa Ulttyq Qaýipsizdik Keńesiniń Bas hatshysy Okaı Memıshpen, Ózbekstan Prezıdenti janyndaǵy Qaýipsizdik Keńesiniń Hatshysy Vıktor Mahmýdovpen ekijaqty kelissózder ótkizdi.
Budan bólek, TMU elderinen kelgen delegatsııalar basshylary Ázerbaıjan Respýblıkasynyń Prezıdenti Ilham Álıevpen kezdesti. Áńgimelesý barysynda óńirlik turaqtylyq pen qaýipsizdikti qamtamasyz etý úshin dıalogty odan ári ilgeriletý men yntymaqtastyqty tereńdetýdiń mańyzdy ekeni rastaldy.
