Aıda Balaeva terrorızm men jasandy ıntellektiden týyndaıtyn qaýip-qaterlerge nazar aýdardy
ASTANA. KAZINFORM – Máskeýde TMD-ǵa múshe memleketterdiń qaýipsizdik keńesteri hatshylarynyń XIV kezdesýi ótti. Qazaqstan delegatsııasyn Qazaqstan Respýblıkasy Qaýipsizdik Keńesi Tóraǵasynyń orynbasary Aıda Balaeva bastap bardy, dep habarlady Aqorda.
Otyrysta halyqaralyq jáne óńirlik qaýipsizdiktiń ózekti máseleleri, Dostastyq aıasyndaǵy yntymaqtastyqty nyǵaıtý múmkindikteri qaraldy.
Aıda Balaeva terrorızm men ekstremızmge, kıberqaýipke jáne halyqaralyq esirtki bıznesine qarsy kúres, sondaı-aq tótenshe jaǵdaılardyń aldyn alý sekildi birqatar basym baǵytqa toqtaldy.
Qazaqstan Respýblıkasy Qaýipsizdik Keńesi Tóraǵasynyń orynbasary qaýip-qater kúsheıgen kezeńde atalǵan baǵyttarda birlese jumys isteýdiń mańyzyn atap ótti.
Terrorıstik jáne ózge de zańsyz áreketterge jasandy ıntellektini paıdalaný qaýpine, sondaı-aq asa mańyzdy ınfraqurylymdy qorǵaý men esirtki bıznesiniń tsıfrlyq arnalaryna tosqaýyl qoıý máselelerine erekshe nazar aýdaryldy.
Terrorıstik qaterlerdiń jańa túrlerine jáne esirtki bıznesimen aınalysatyn transulttyq qylmystyq toptarǵa qarsy kúreste birlesken is-qımyldy nyǵaıtý jóninde birqatar naqty usynys aıtyldy.
Prezıdent Qasym-Jomart Toqaevtyń Klımattyq jáne tehnogendik sıpattaǵy tótenshe jaǵdaılardy boljaý jónindegi óńirlik ortalyq qurý týraly bastamasynyń mańyzy atap ótildi.
Іs-shara aıasynda Aıda Balaeva Reseı Federatsııasy Qaýipsizdik Keńesiniń hatshysy Sergeı Shoıgýmen jáne Belarýs Respýblıkasy Qaýipsizdik Keńesiniń memlekettik hatshysy Aleksandr Volfovıchpen kelissóz júrgizdi. Taraptar óńirlik qaýipsizdiktiń ózekti máseleleri jóninde pikir almasyp, aımaqtaǵy syn-qaterler men qaýipterdi, sondaı-aq birlese áreket etý is-sharalaryn talqylady.
Sonymen qatar TMD-ǵa múshe memleketterdiń qaýipsizdik keńesteri ókilderi Máskeýdegi Belgisiz jaýynger beıiti janyndaǵy Máńgilik alaýǵa gúl shoǵyn qoıý rásimine qatysty.
Aıta keteıik, buǵan deıin Shymkentte Qazaqstan men Ózbekstan qaýipsizdik keńesteri apparattarynyń segizinshi konsýltatsııalyq kezdesýi ótken bolatyn. Onda terrorızm, ekstremızm, kıberqylmys jáne jasandy ıntellektini paıdalanýǵa baılanysty jańa qaýip-qaterler talqylandy.
