Aıda Balaeva sý tasqynyna qatysty rastalǵan aqparatqa ǵana senýge shaqyrdy
ASTANA. KAZINFORM – Mádenıet jáne aqparat mınıstri Aıda Balaeva el turǵyndaryn sý tasqynyna qatysty rastalǵan aqparatqa ǵana senýge jáne jalǵan málimetter taratpaýǵa shaqyrdy.
«Qazir elimizdegi sý tasqynymen kúres qarqyndy júrip jatyr jáne onyń qaýpi áli báseńdegen joq. Qarǵyn sýmen kúreske qoldaǵy barlyq kúsh pen rezerv, adam resýrsy men qajetti tehnıkalar túgel jumyldyryldy. Sý basqan óńirlerdiń turǵyndary, olarmen birge jıyrma myńnan astam volonter memlekettik organdarmen birigip jumys jasaýda. Otandastarymyz aýyzbirlik pen janashyrlyq tanytyp, judyryqtaı jumylyp jatyr. Óz kásibine adal tótenshe jaǵdaı qyzmetkerleri, áskerı qyzmetshiler, ishki ister qyzmetkerleri men memlekettik qyzmetshiler táýlik boıy jumys isteýde. Qazir árbir adam, árbir tehnıka men eńbek kúshi óte mańyzdy. Kóp resýrsty qajet etetin osy bir qıyn sátte biz aqparat taratýda dál osyndaı júıeli túrde qımyldap, úlken jaýapkershilik tanytýymyz qajet», - dep jazdy mınıstr Facebook paraqshasynda.
Onyń atap ótýinshe, ókinishke qaraı, apattar men sý tasqyny týraly jalǵan habarlarǵa baılanysty qutqarý brıgadalarynyń jumys kúshi qajet emes jerlerge baǵyttalǵan jaǵdaılar da boldy. Saldarynan eń qajetti ýaqyt tekke ketti, resýrstar paıdasyz shyǵyn boldy.
«Aqparat salasyna júrgizilgen monıtorıng barysynda biz jalǵan aqparat bolyp shyqqan 29 faktini anyqtadyq. Ol habarlamalardyń barlyǵy tıisti tekserýden keıin ýákiletti organdar tarapynan shynaıy emes ekeni anyqtaldy. Jalǵan aqparattar kóbine messendjerler arqyly taralady. Eń kóp taraǵan aqparattar qataryna bógetterdiń buzylýy, respýblıkalyq mańyzy bar joldardy sý basýy, sý qoımalaryndaǵy, elektr stantsııalaryndaǵy jáne basqa da strategııalyq obektilerdegi apattar, aýyz sýdyń lastanýy, evakýatsııalaý oryndary, qarajat jınaý jáne tóleý týraly jalǵan málimetter jatady. Máselen, Aqtóbedegi sý qoımasy shlıýzderin ashý týraly áleýmettik jelide jalǵan aqparat tarady. Ony keıin Aqtóbe oblysynyń ákimdigi joqqa shyǵardy. Qostanaı oblysynyń ákimdigi B.Maılın aýdanyndaǵy Aıat ózeni arqyly ótetin kópirdiń bir bóliginiń qulaýy, sondaı-aq óńirdegi mal qorymdaryn sý basqany týraly habarlamany resmı túrde teristedi», - dedi Aıda Balaeva.
Mınıstr osy faktiler boıynsha tótenshe jaǵdaı qyzmetkerleri sol jerlerge arnaıy barǵanymen, aqparattyń rastalmaǵanyn erekshe atap ótedi.
«Basqa jerlerdegi shyn kómekke muqtaj jandar kútip otyratynyn, olardyń arasynda balalardyń bar bolýy múmkin ekenin umytpaıyq. Densaýlyq saqtaý mınıstrligi de sý basqan aýmaqtarda juqpaly aýrýlardyń órshý qaýpi jáne epıdemıologııalyq qyzmet tarapynan jaǵdaıdy baqylaýdyń jetkiliksizdigi týraly jalǵan aqparat taraǵanyn málimdep otyr», - dedi ol.
Onyń atap ótýinshe, tasqynnan zardap shekkenderge arnalǵan tólemder týraly da ádeıi jalǵan habarlamalar taratý úlken qaýip tóndiredi.
«Sońǵy kúnderi sý tasqynynan zardap shekkenderge Memleket basshysy tarapynan ýáde etiledi degen mıllıondaǵan dollar tólemderi, Premer-Mınıstr men Úkimet músheleriniń atynan aqshalaı qarajat jınaý týraly jalǵan habarlamalar paıda boldy. Mundaı aqparatqa senbeýge shaqyramyn. Alaıaqtar sý tasqyny jaǵdaıyn ózderiniń jeke maqsatyna paıdalana bastady. Teris nıettiler qazaqstandyqtardyń jeke derekteri men qarjylyq resýrstaryn urlaý úshin ınternette «Tólemder úshin JSN-di tekserińiz», «3 mıllıon teńgege deıin ótemaqy alý», «Memleketten múmkindiginshe tezirek járdemaqy alý» degen sııaqty habarlamalar jarııalaıdy. Jarnamalaryn senimdi kórsetý úshin qylmyskerler qazaqstandyq bankter men memlekettik mekemelerdiń ataýyn paıdalanady. Mysaly, Facebook, Instagram jáne Telegram jelilerinde Eńbek jáne halyqty áleýmettik qorǵaý mınıstrliginiń ártúrli banktermen birlesip tóleıtin tólemderi týraly habarlamalar jıi jarııalanady. Sondaı-aq, Qarjy mınıstrligi jańa qaýly qabyldap, shyǵynnyń ornyn toltyryp jatyr eken degen jalǵan aqparat júr. Adamdardy jańylystyrý úshin alaıaqtar ár jazbanyń astyna alǵys sózderi bar bot pikirlerin jazady», - dedi ol.
Aıda Balaevanyń atap ótýinshe, bul kórineý jalǵan habarlamalardyń barlyǵy memlekettik organdar arqyly jedel teriske shyǵarylyp, barlyq faktiler boıynsha quqyq qorǵaý organdaryna habarlamalar jiberildi. Barlyq anyqtalǵan zańsyz faktilerge quqyqtyq baǵa berý, jedel-izdestirý jáne is júrgizý úshin materıaldar quqyq qorǵaý organdaryna joldandy.
«Sondyqtan tek resmı jáne rastalǵan aqparatqa senińizder. Barlyq kúmándi faktilerdi birneshe ret tekserińiz jáne kúmándi habarlamalardy ary qaraı taratpańyz! Esińizde bolsyn, barlyq jalǵan habarlamalardyń maqsaty — úreı týdyrý, halyqty jikke bólý, memlekettik qyzmetter men volonterlerdiń kelisilgen jumysyn uıymdastyrýdy buzý jáne qarapaıym halyqtyń qaıǵy-qasiretin paıdalanyp tez paıda tabý. Sondaı-aq sý tasqyny men buzylǵan óńirlerdi qalpyna keltirý sharalaryn obektıvti túrde jarııalap júrgen BAQ ókilderine arnaıy alǵysymdy bildirgim keledi», - dedi mınıstr.
