Aıda Balaeva Shymkentte «Jastar» teatrynyń jumysymen tanysty
ASTANA. KAZINFORM - QR Premer-mınıstriniń orynbasary – Mádenıet jáne aqparat mınıstri Aıda Balaeva Shymkent qalasyndaǵy «Jastar» teatryna baryp, Muhtar Áýezovtiń tragedııasy jelisinde sahnalanǵan «Eńlik – Kebek» spektaklin tamashalady.
Qoıylym – qazaq dramatýrgııasynyń altyn qoryna engen, ult rýhy men halyqtyń tarıhı taǵdyryn tereń beıneleıtin kórnekti týyndy. Teatr ujymy spektakldi jańa rejısserlik sheshimmen usynyp, klassıkalyq shyǵarmany zamanaýı sahnalyq til arqyly jańasha paıymdaǵan.
Teatrǵa sapary aıasynda Aıda Balaeva ujymnyń tynys-tirshiligimen tanysyp, qyzmetkerlermen kezdesý ótkizdi.
-Memleket basshysy mádenıet salasyna erekshe mán beredi. Prezıdent ult rýhyn asqaqtatyp, rýhanı tutastyqty nyǵaıtyp júrgen sizder – mádenıet qaıratkerleriniń eńbegin árdaıym joǵary baǵalaıdy, – dedi ol.
Bıyl «Jastar» teatrynyń ashylǵanyna bir jyl tolyp otyr. Qazirgi ýaqytta teatr repertýarynda 10 qoıylym bar. Jas teatr halyqaralyq deńgeıde de tanylyp úlgerdi.
2025 jyly Aljırde ótken The International Cultural Festival of Desert Theatre festıvalinde bas júldeni jeńip aldy. Sonymen qatar 2026 jylǵy sáýirde Frantsııadaǵy GRRRANIT – Scène nationale de Belfort teatrymen yntymaqtastyq týraly memorandýmǵa qol qoıyldy. Sondaı-aq teatr Italııa, Koreıa jáne Kanada elderindegi áriptesterimen áriptestik baılanys ornatyp, birlesken jobalardy júzege asyrý jáne halyqaralyq festıval uıymdastyrý baǵytyndaǵy múmkindikterdi qarastyryp otyr.
Búginde teatr ujymynda 145 adam eńbek etedi. Onyń ishinde 50 ártis jáne 18 shyǵarmashylyq quram ókili bar.
Osyǵan deıin Aıda Balaevanyń jumys saparymen Shymkentke barǵany týraly jazdyq.
Aıta keteıik, búgin «Qozy Kórpesh – Baıan sulý» kúni.
