Aıda Balaeva sheteldegi qandastardy qoldaý sharalary týraly aıtty
«Qandastardy, sheteldegi otandastarymyzdy qoldaý – memlekettik saıasattyń basym baǵyttarynyń biri. Atajurtqa oralǵan qandastarymyz kóp. Bul maqsatta júıeli jumystar legi júrgizilip jatyr. 2018 jyly «Otandastar» qory quryldy. Qor qazirgi tańda belsendi túrde jumysyn jalǵastyrýda», - dedi Aıda Balaeva Parlament Senatynyń otyrysynda.
Mınıstr keıingi bir jarym jyldyń ishinde qandastarymyzdyń qoldaý maqsatynda 3 myńǵa tarta shara ótkizilgenin jetkizdi.
«Balalar lageri uıymdastyrylyp, qazaq tilin úırený kýrstary bastaldy. Ádistemelik quraldar ázirlendi. Álemdegi 12 memlekettiń 23 qalasynda qazaq tilin úıretýge arnalǵan 31 onlaın-synyp ashyldy. Olar qazir belsendi jumys júrgizip jatyr. Sheteldegi 250 qazaq ortalyǵymen yntymaqtastyq ornatyldy. Bul jumys júıeli túrde jalǵasyn tabady», - dedi Aıda Balaeva.
Budan bólek mınıstr sheteldegi qandastardy qoldaýǵa baǵyttalǵan 2021-2025 jyldarǵa arnalǵan baǵdarlama ázirlengenin jetkizdi.
Óz kezeginde Parlament Senatynyń tóraǵasy Máýlen Áshimbaev qandastardyń máselesin erekshe nazar aýdarý kerektigin aıtyp ótti.
«Azamattyq alý úshin qujattardyń tizimin azaıtý jáne osy rásimdi jeńildetý máselesi bar. Búgingi kúni qandastarymyz bul jumystarmen basy qatyp jarty, tipti bir jylǵa deıin júredi. Ana jaqtan, myna jaqtan qaǵazdardy jınaý kerek dep, áýre-sarsańǵa túsedi. Qandastarymyz osy rásimdi jeńildetý máselesin jıi kóteredi. Bul jerde de Úkimet tarapynan bir jumystardyń bastalǵanyn bilemiz. Naqty nátıje bolar dep úmittenemiz», - dedi ol.
