Saılaýdan keıin Úkimette ózgeris bola ma – Aıda Balaeva jaýap berdi
ASTANA. KAZINFORM - QR Premer-mınıstriniń orynbasary – Mádenıet jáne aqparat mınıstri Aıda Balaeva Quryltaı saılaýynda daýys bergennen keıin saılaý naýqanyna qatysty pikir bildirdi.
Vıtse-premer saılaý naýqany barysynda saıası partııalardyń belsendilik tanytqanyn atap ótip, endigi tańdaý azamattardyń enshisinde ekenin aıtty.
- Partııalar saılaý naýqanyna óte kreatıvti ári belsendi qatysty jáne árqaısysy ózderiniń partııalyq baǵdarlamalarynyń artyqshylyqtaryn kórsetýge tyrysty. Qazaqstandyqtardyń beıjaı qaramaı, saılaý naýqanyn baqylap, belsendi qatysyp, baǵdarlamalardy tyńdaǵany óte jaqsy. Búginde olardyń eń úzdik partııalyq baǵdarlamaǵa daýys berýge tamasha múmkindigi bar dep oılaımyn. Óıtkeni barlyq partııanyń, árıne, Quryltaı quramyna barynsha kóp oryn alýdy kózdeıtini belgili. Alaıda muny saılaýshylar anyqtaıdy. Meniń oıymsha, óz partııalyq baǵdarlamasynyń artyqshylyqtaryn kórsete alǵan eń belsendi partııa jeńiske jetedi, – dedi Aıda Balaeva jýrnalısterge.
Bolashaq Quryltaı qandaı bolýy kerek degen suraqqa jaýap bergen mınıstr onyń kásibı jumys isteýi jáne halyqpen tyǵyz qarym-qatynas ornatýy qajet ekenin atap ótti.
- Kásibı bolýy kerek, halyqtyń múddesin shyn máninde kózdeýi tıis. Halyqpen tyǵyz qarym-qatynasta jumys isteýi qajet, óıtkeni Ulttyq Quryltaıdy halyq saılaıdy. Meniń oıymsha, Quryltaı depýtattary bizdi, saılaýshylardy uıatqa qaldyrmaıdy, – dedi Aıda Balaeva.
Saılaýdan keıin Úkimettiń quramy ózgerýi múmkin be degen suraqqa Aıda Balaeva naqty baǵa berýge beıim emes ekenin aıtyp, qazirgi Úkimet músheleriniń kásibıligin atap ótti.
- Meniń oıymsha, búgingi tańda jumys istep otyrǵan Úkimet quramy óte kásibı. Kóptegen mınıstr óz qyzmetinde qalady dep oılaımyn. Memleket basshysynyń júzege asyrylyp jatqan naqty mindetteri men bastamalary bar. Olar kezeń-kezeńimen iske asyrylýda. Menińshe, kóptegen mınıstr osy baǵytty jalǵastyryp, jumysyn ári qaraı atqarady jáne Úkimet quramynda qalady, – dedi ol.
Óz salasyndaǵy basym mindetter týraly aıtqan mınıstr jańa Konstıtýtsııaǵa sáıkes zańnamany sáıkestendirý qajettigin atap ótti.
- Eń bastysy – qazir jańa Konstıtýtsııa bar. Biz barlyq zańdarymyz ben zańǵa táýeldi aktilerimizdi soǵan sáıkestendirýimiz kerek. Alda bolashaq Quryltaımen, Quryltaı depýtattarymen birge atqaratyn aýqymdy jumys tur. Árıne, Memleket basshysy aıtqan barlyq bastamalardy da júzege asyrýymyz qajet. Bul – barlyq salany tsıfrlandyrý, barlyq azamatqa teń múmkindik berýge baǵyttalǵan áleýmettik saıasat. Bul óte mańyzdy. Sondyqtan, árıne, biz osy baǵytta jumys isteıtin bolamyz, – dedi vıtse-premer.
Aıda Balaeva aqparat jáne mádenıet salalaryna qatysty máselelerge de jeke toqtalyp, «zań jáne tártip» qaǵıdatyn saqtaý jáne jalǵan aqparattyń taralýyna qarsy is-qımyl qajettigin atap ótti.
- Eger men jańa Úkimettiń quramynda bolsam, medıasala men onlaın-platformalar salasyndaǵy zańnamany jetildirý baǵytynda jumys isteıtin bolamyz. Qoǵamda qanshama másele týyndap jatqanyn kórip otyrmyz. Qazirdiń ózinde bizde sizdermen birge talqylaıtyn úlken túzetýler paketi bar, – dep qorytyndylady Aıda Balaeva.
Aıta keteıik, Aıda Balaeva Ulttyq akademııalyq kitaphana ǵımaratynda daýys berdi.
