Aıda Balaeva: «Rýhanı jańǵyrý» ıÝNESKO men BUU-nyń mıssııasymen úndes

ASTANA. QazAqparat - ıÝNESKO shtab-páterinde qazaqstandyq «Rýhanı jańǵyrý» baǵdarlamasynyń aýqymdy tusaýkeseri bastaldy. Sharanyń maqsaty týraly «QazAqparat» HAA tilshisine QR Prezıdent Ákimshiligi Іshki saıasat bóliminiń meńgerýshisi Aıda Balaeva aıtyp berdi.

- Aıda Ǵalymqyzy, joǵary deńgeıde álemdik sarapshylarǵa qazaqstandyq «Rýhanı jańǵyrý» baǵdarlamasyn tanystyrý týraly sheshim nelikten qabyldandy?

- El Prezıdentiniń «Rýhanı jańǵyrý» baǵdarlamasynda usynylǵan ıdeıada álemdik trendter keńinen eskerilgen. Onyń mańyzy Qazaqstan úshin ǵana emes, barlyq halyqaralyq qaýymdastyq úshin ózekti. Sondyqtan, biz baǵdarlamany aýqymdy deńgeıde tanystyrý kerek dep sheshtik. Bul tusaýkeser qazaqstandyq modeldi ashyq talqyǵa salýǵa baǵyttalyp otyr.

Ekinshi jaǵynan, biz konstrýktıvti pikirler men jańa ıdeıalardy kútemiz. Sonymen qatar, álemdik qaýymdastyq qazaqstandyq baǵdarlamadaǵy paıdaly joldy kórip, onyń áleýetin qoldana alady degen senimdemiz.
 

- Bul úshin nelikten ıÝNESKO tańdaldy?

- Qazaqstandyq modeldiń mazmuny bul uıymdaǵy jumystardyń baǵyttarynyń talaptaryna jaýap bere alady. «Rýhanı jańǵyrý» negizinde gýmanıtarlyq damý, adam kapıtalynyń artyqshylyǵy jatyr. Bul ıÝNESKO men BUU-nyń mıssııasymen úndes.   

- ıÝNESKO shtab-páterinde «Rýhanı jańǵyrý» baǵdarlamasy ǵana emes, «Jahandyq álemdegi qazirgi qazaqstandyq mádenıet» jobasynyń da tusaýkeseri ótip jatyr. Bul turǵyda qandaı mindetter alǵa qoıylyp otyr?

- Bizdiń elimizde ıÝNESKO uıymymen syndarly jumys atqarý tájirıbesi jeterlik. Qazaqstan naqty osy uıym qoldaǵan bastamalardy usyndy.

Qazaqstandyq taraptyń bastamasymen 2013-2022 jyldar Halyqaralyq mádenıetterdi jaqyndastyrý onjyldyǵy bolyp jarııalandy. Qazirgi tańda ıÝNESKO uranymen Memleket basshysynyń bastamasy boıynsha Almatyda Mádenıetterdi jaqyndastyrýdyń halyqaralyq ortalyǵy ashylǵaly jatyr.

Qazaqstannyń bastamasymen ıÝNESKO Jibek joly boıynsha halyqaralyq onlaın-platforma retinde resmı túrde jumys bastady.

Bizdiń «Jahandyq álemdegi qazirgi qazaqstandyq mádenıet» atty jobamyz «Rýhanı jańǵyrý» baǵdarlamasy aıasynda júzege asyrylady. Bul halyqaralyq mádenı baılanysty nyǵaıta túsetin taǵy bir dıalog.

Sheteldik aýdıtorııaǵa otandyq mádenıettiń eń ozyq úlgilerin tanystyratyn sharalar legi ótkiziledi. Bizdiń barlyq mádenı baılyǵymyzdy tıimdi túrde kórsetý úshin halyqaralyq seriktesterdiń atsalysqany kerek. Bul jumysty bastaý úshin ıÝNESKO taptyrmaıtyn alań ekenin aıta ketken jón.