Aıda Balaeva: Ramazan - rýhanı jańarý men tazarýǵa úndeıtin aı

NUR-SULTAN. QazAqparat - QR Aqparat jáne qoǵamdyq damý mınıstri Aıda Balaeva qazaqstandyqtardy Ramazan aıynyń kelýimen quttyqtady, dep habarlaıdy QazAqparat mınıstrliktiń Telegram kanalyna silteme jasap.

«Qurmetti qazaqstandyqtar!

Elimizdiń barsha musylman qaýymyn qasıetti Oraza aıynyń kirýimen shyn júrekten quttyqtaımyn.

Ramazan – izgilik pen parasatqa, rýhanı jańarý men tazarýǵa úndeıtin, ótkennen qalǵan ókpe-renishterden arylyp, qaıyrymdy ister jasaıtyn mezgil.

Ókinishke oraı, bıylǵy Ramazan aıynda da pandemııa jaǵdaıy saqtalyp tur. Osy oraıda, azamattarymyzdy sanıtarlyq-epıdemıologııalyq norma talaptaryn saqtaýǵa jáne Múftııattyń usynymdaryn oryndaýǵa shaqyramyn. Qaýipti indetti jeńip shyǵý úshin aýyzbirlik pen sabyr, tártip pen tózim qajet.

Qasıetti aıda tutqan orazalaryńyz, jasaǵan izgi amaldaryńyz, tilegen duǵa-nıetterińiz qabyl bolsyn. Denderińizge saýlyq, otbasylaryńyzǵa amandyq, baq-bereke tileımin!»,-delingen mınıstrdiń quttyqtaýynda.