Aıda Balaeva: Prezıdent Joldaýy elimizdi damýdyń jańa deńgeıine shyǵarýǵa baǵyttalǵan

NUR-SULTAN. QazAqparat – Qazaqstan halqy Assambleıasynyń keńesi Prezıdenttiń «Jańa Qazaqstan: jańarý men jańǵyrý joly» atty Joldaýyn júzege asyrý joldaryn talqylap jatyr, dep habarlaıdy QazAqparat tilshisi.

Sharaǵa QR Prezıdenti ákimshiligi basshysynyń orynbasary Aıda Balaeva, Assambleıa músheleri men qoǵamdyq uıym ókilderi qatystyp otyr.

«Prezıdenttiń bárimizdi Jańa Qazaqstannyń aınalasyna toptasýǵa, jańarý men jańǵyrý jolyna shaqyrýy ádiletti. Joldaýdyń basym baǵyttary men mindetteri Qazaqstannyń Táýelsizdiktiń 30 jylyndaǵy jetistikteri jıyntyǵyna negizdelgen. Biz Prezıdent saıasatynyń birizdigin, iske asyryp jatqan reformalary elimizdi damýdyń jańa deńgeıine shyǵarýǵa baǵyttalǵanyn kórip otyrmyz. Búgin biz elimizdiń memlekettik qurylystyń jańa kezeńine shyqqanyn senimmen aıta alamyz. Onyń negizi saıası júıeni jyldar boıy shoǵyrlanǵan qoǵamdyq máselelerge, túbegeıli ózgerýlerge baǵyttalǵan keshendi jańǵyrtý baǵdarlamasy bolmaq», - dedi Aıda Balaeva.

Onyń paıymynsha, Prezıdent Joldaýynda kórinis tapqan reformalar ornyqty ári jan-jaqty oılastyrylǵan sheshimderge negizdelgen.

«Memleket basshysy ár qazaqstandyqtyń kókeıine ózi úshin eldiń baqýatynan mańyzdy eshteńe joq ekenin aıqyn ári shyn júrekten jetkize bildi. Árqaısymyz sol baqýattyń jaýapkershiligi bárimizdiń moınymyzda ekenin túsinip otyrmyz», - dedi Aıda Balaeva.