Aıda Balaeva: Ortalyq Azııa elderine ortaq problemanyń biri – jalǵan aqparat
ASTANA. KAZINFORM — Mádenıet jáne aqparat mınıstri Aıda Balaeva aqparat qaýipsizdigine qatysty birqatar máseleni kóterdi.
— Onlaın-platformalardyń ákimshilikterimen pármendi ózara is-qımyl ornatý boıynsha turaqty negizde sharalar qabyldap kelemiz. Osyǵan deıin istelgen jumystardyń arqasynda qazir Qazaqstanda «Facebook», «Instagram», «Vkontakte», «Odnoklassnıkı», «Tıktok», «Mail.ru» jáne basqa servısterdiń ókilderi aıqyndaldy. Sondaı-aq Qazaqstan zańsyz kontent (kıberbýllıng, alaıaqtyq, ekstremızm, pornografııa) pen jalǵan aqparatty taratýǵa qarsy kúreste aıtarlyqtaı progreske qol jetkizdi. Bul baǵyttaǵy mańyzdy jetistikterge kámeletke tolmaǵandardy tsıfrlyq keńistikte qorǵaýda qol jetkizildi, — dedi Aıda Balaeva Ortalyq Azııa medıaforýmynda.
Osy oraıda mınıstr 2018 jyly zııandy kontentke qol jetkizýdi shekteýdiń quqyqtyq tetikterin bekitken «Balalardy densaýlyǵy men damýyna zııan keltiretin aqparattan qorǵaý týraly» zań qabyldanyp, áli kúnge jetildirilip keledi.
— Sol tetikter aqparattyq keńistiktegi balalardyń qaýipsizdiginiń negizderin qamtamasyz etýde mańyzdy qadam boldy. Qabyldanǵan sharalardyń arqasynda «balalardyń aqparattyq qaýipsizdigi», «balalardy densaýlyǵy men damýyna zııan keltiretin aqparattan qorǵaý», «balalardyń aqparatqa qol jetkizýi» sııaqty anyqtamalar paıda boldy, balalar úshin tyıym salynǵan kontenttiń tizbesi bekitildi, aqparattyq ónimderge jas shekteýleri belgilendi, — deıdi ol.
Sondaı-aq vedomstvo basshysy jalǵan aqparattar taratý máselesin kóterdi.
— Mass-medıany damytýda sońǵy trendterdi eskere otyryp, Ortalyq Azııanyń barlyq eli úshin ortaq problemalardyń biri — áleýmettik jeliler men messendjerlerde anyq emes aqparatty, ártúrli jalǵan aqparat pen arandatýshylyq sıpattaǵy habarlamalardy taratý. Feıkterge qarsy kúreste «Stopfake.kz» qazaqstandyq jobasy sátti jumys istep keledi, — dep tolyqtyrdy Aıda Balaeva.
Buǵan deıin Mádenıet jáne aqparat mınıstri Ortalyq Azııa jýrnalıster akademııasy men kreatıvti hab qurýdy usyndy. Sonymen qatar Ortalyq Azııa elderiniń BAQ ókilderine arnalǵan ortaq syılyq taǵaıyndaý bastamasyn alǵa tartty.
Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.